Ապրիլի 21-ին Լոռու մարզից Տավուշի Նոյեմբերյանի տարածաշրջան է այցելելու ՀՀ նախագահ Սերժ Սարգսյանը: Նա Այրում քաղաքից Բագրատաշեն կմեկնի Այրումի սողանքի գոտին շրջանցող նեղլիկ, անբարեկարգ, քարքարոտ ճանապարհով:
2011թ. հոկտեմբերից 2-ի սողանքից քանդված միջպետական ճանապարհի 350 մետրանոց հատվածը մինչ այժմ չի վերականգնվել: 45 օր է, ինչ «Ճանապարհաշինարար» ՍՊԸ-ն սկսել է սողանքից փլված ճանապարհահատվածի վերականգնումը: Պետբյուջեից այդ նպատակով հատկացվել է 550 միլիոն դրամ: «Ճանապարհաշինարար» ՍՊԸ ղեկավար Էդվարդ Բեզոյանն ասաց, որ իրենց ընկերություն ունի անհրաժեշտ տեխնիկական եւ մարդկային ռեսուրսները, որպեսզի պայմանագրով նախատեսված ժամկետից՝ հուլիսի 16-ից շուտ վերականգնի քանդված ճանապարհը: Վերջերս սողանքի գոտում ջրի բնական հոսք է հայտնաբերվել:
Պարոն Բեզոյանից հետաքրքրվեցինք, թե դա չի՞ խանգարի իրենց աշխատանքներին: Նա ասաց, որ այդ պատճառով իրենք հրավիրել են երկաբանական հետազոտություն կատարող ընկերության եւ նախագծողների: «Ճանապարհաշինարար» ՍՊԸ տնօրենը հավաստիացրեց, որ ջրի հոսքը ճանապարհի վերականգնման աշխատանքներին չի խանգարելու, ջրահեռացման խնդիրը լուծվելու է: Նշենք, որ 2011թ. դեկտեմբերին, ձմռան ցրտին պետբյուջեի ֆինանսավորմամբ Իջեւանում, Կողբում, Նոյեմբերյանում համայնքային նշանակության ճանապարհներ էին ասֆալտապատում, իսկ միջպետական ճանապարհի սողանքից քանդված հատվածում մեծ լռություն էր:
Հնարավոր չէ՞ր այդ 550 միլիոն դրամն ավելի շուտ հատկացնել, ներհամայնքային ճանապարհների ձմեռային ասֆալտապատումը միջպետական ճանապարհի վերականգնումից հրատա՞պ էր: Այրումի ճանապարհի փակ լինելու պատճառով Հայաստան բեռներ ներկրող խոշոր բեռնատարները ստիպված երթեւեկում են Նոյեմբերյան-Իջեւան ճանապարհով: 40-50 տոննա քաշով մեքենաների ճնշումից Նոյեմբերյան-Իջեւան ճանապարհի Նոյեմբերյան-Ջուջեւան, Ոսկեպար-Կիրանց հատվածներում, շատ տեղերում ասֆալտի ծածկույթը շարքից դուրս է եկել: Հավելենք, որ Այրումի սողանքից քանդված հատվածում վթարվել է Դեբեդի հովտի 8 համայնքների ավելի քան 1000 հա տարածք ինքնահոս ոռոգող ջրագիծը: Այդ ջրագծի վերականգնումը պետք է կատարվի միջպետական ճանապարհի վերականգնումից հետո:
Կարդացեք նաև
Ոսկան ՍԱՐԳՍՅԱՆ
