«Ժամանակին ՀԱԿ-ի ներկայացուցիչներն ասում էին՝ ընդդիմություն է նա, ում Բազազը ծեծում է, այն ժամանակ խոսակցություն կար, ՀԱԿ-ի ակտիվիստներին ծեծում են: Թույլ չենք տալու, որ պարտադրեն մեզ չափանիշներ, թե ով է ընդդիմություն»,- այսօր «Փաստարկ» ակումբում ասաց «Ժառանգություն» խմբակցության ղեկավար Ստյոպա Սաֆարյանը: Լրագրողները նրան փոխանցեցին ՀՀԿ փոխնախագահ Գալուստ Սահակյանի հետեւյալ խոսքերը. «Բոլոր աղանդները հարում են «Ժառանգությանը»: Հարցին՝ ուսումնասիրություն արե՞լ եք՝ նա պատասխանեց. «Մենք հավատաքննիչ չենք, մենք երբեք ընտրողին չենք հարցնում, թե որ Աստծուն է հավատում, ինչ կրոնական համոզմունքներ ունի»: Նա մի դեպք պատմեց՝ ապացուցելու, որ Գալուստ Սահակյանը սխալվում է. «Արմավիրի Մյասնիկյան գյուղում այցելության ժամանակ քիչ մարդիկ կային, ինձ թվում էր՝ այդ 3 մարդն են մեզ դիմավորելու, ասացին ԱԱԾ-ից ենք, եկել ենք անվտանգությունն ապահովելու, ասացի՝ մենք ձեր կարիքը չունենք: Երբ սկսեցինք տնետուն մտնել, մեզ էլի հետեւեցին, մի մայր ու աղջկա հանդիպեցինք, տվեցինք «Ժառանգության» բրոշյուրը, ասացինք ծանոթացեք, ասացին՝ «որդյակ իմ, մենք արդեն ընտրել ենք, մենք ընտրել ենք Աստծո թագավորությունը»: Այսինքն՝ կրոնական ուղղություն ունեցողները չեն ուզում կատարել իրենց ընտրելու պարտքը եւ մասնակցել ընտրությանը»:
Անդրադառնալով նրան, թե ինչու են ՀՀԿ-ից ջերմ խոսքեր ասում ձեր հասցեին, որ «Ժառանգությունը» ճիշտ ընդդիմություն է՝ Ստյոպա Սաֆարյանը նշեց. «Եթե ՀՀԿ-ն ջերմ խոսքեր է ասում «Ժառանգության» հասցեին, ինչու չեք մտածում, որ դա անում են ոչ թե մեր, այլ հենց ՀՀԿ-ի համար: Եթե ուզում ես համակրանքի արժանանալ, պիտի առնվազն քեզ կոռեկտ պահես: Անխոհեմ են այն ուժերը, որոնք հարձակվում են «Ժառանգության» վրա, նրանք վաստակում են «Ժառանգության» ընտրողների հակակրանքը: Եթե մարդը մի քիչ խելք ունի, պիտի գովի «Ժառանգությանը»:
Հռիփսիմե ՋԵԲԵՋՅԱՆ
