Այսօր կայացած արտահերթ նիստում հավանության է արժանացել ՀՀ կառավարության 2012-2017 թթ. գործունեության ծրագիրը, որը ներկայացրել է վարչապետ Տիգրան Սարգսյանը: Նա ասել է, թե կառավարության ծրագրի հիմքում ընկած է այն գաղափարը, որ պետությունը պարտավոր է մարդու համար ստեղծել արժանապատիվ ապրելու և արարելու լավագույն հնարավորությունները: Իհարկե գեղեցիկ բաներ ասելը դժվար չէ` հայտնի անեկդոտի նման, երբ ընկերներից մեկը խորհուրդ է տալիս մյուսին` «Է դո’ւ էլ ասա»: Փաստն այն է, որ այսօր կարող են ինչ-որ մեկի, որը նաեւ պատգամավոր է, «օբյեկտի» բակում ծեծի ենթարկել մարդուն ու բնականաբար դրա համար չպատժվել կամ ամեն ինչ ավարտել ծածկադմփոցով: Ավելի խայտառակ բաների մասին, որոնք քաղաքական ու ոհմակային ենթատեսքտ ունեն, բնավ կարիքը չկա հիշեցնելու, եթե ասեմ` հայտնություն արած չեմ լինի:
Ի թիվս պոպուլիստական այլ խոստումների, կառավարության 2012-2017 թթ. ծրագրում նաեւ որակյալ կրթական, առողջապահական և մշակութային ծառայությունների մատչելիության ապահովումն է, եւ որ ամենաոչիրատեսականն է` աղքատություն և անհավասարություն ծնող պատճառների վերացումը, արժանապատիվ ծերության ապահովումը: Իսկ սա ուղղակի կառավարական մակարդակի անեկդոտ է հիշեցնում կամ ծաղր. «ինքնաիրացման պայմանների առկայության և արդարության ապահովում՝ որպես արտագաղթի կանխարգելման արդյունավետ միջոց»: Ինչ վերաբերում է ըստ կառավարության ծրագրի «մարդու և բնության ներդաշնակ զարգացմանը», դա էլ երեւի կառավարության անդամները իրենց որսի գնալը եւ ցոփուշվայտ վայելքները նկատի ունեն:
