Բերդ քաղաքի բարձրունքում, Սորան կոչված տեղանքում, ուր նաեւ Բերդ քաղաքի պատմության թանգարանն է գտնվում, 1990թ.ապրիլի 24-ին կանգնեցվել է Հայոց մեծ եղեռնի զոհերի հիշատակի կոթող: Դրա վրա նշված է, որ այդտեղ պետք է կառուցվի ցեղասպանության զոհերի հուշահամալիր : Բերդի բնակիչները մեզ հայտնեցին, որ վերջերս անհայտ անձը կամ անձինք տապալել են հուշակոթողը: Լինելով տեղում` տեսա, որ կոթողը կրկին կանգուն է: Սակայն կոթողի հետնամասը հողոտ է, ակնհայտ է, որ այն տապալել են գետին: Հուշարձանի հիմքերը քանդված են, հենքի սալիկները` ջարդված: Տապալված հուշարձանը վերստին տեղադրելու համար դրա տակ կանաչ հողաթմբեր են շարվել: Պատմական արգելոց-թանգարանների եւ պատմական միջավայրի պահպանության Տավուշի մարզային ծառայության պետ Ռաֆիկ Մուրադյանը, դատապարտելով այդ բարբարոսությունը, հայտնեց նաեւ, որ կոթողը իրենց մոտ որպես հուշարձան հաշվառված չէ:
Ոսկան ՍԱՐԳՍՅԱՆ
