«Բարգավաճ Հայաստան» կուսակցության քաղաքական խորհրդի անդամ, վանաձորի ավագանու անդամ Արմեն Այվազյանը սպասվող ՏԻՄ ընտրություններում կրկին իր թեկնածությունն է ինքանառաջադրել: «Չէի կարող չառաջադրվել, որովհետեւ տեսնում եմ, որ կան կիսատ հարցեր , եւ ես կարող եմ նպաստել դրանց լուծմանը»,- այդ մասին այսօր «Լոռի» մամուլի ակումբում լրագրողների հետ հանդիպման ժամանակ ասաց Այվազյանը:
Նա նշում է, որ, թեեւ ինքնառաջադրմամբ է հանդես գալիս, այնուամենայնիվ, դա պատճառ չէ մտածելու, որ կուսակցությունը չի սատարում իրեն: «Անցած անգամ էլ եմ ինքանառաջադրվել, հիմա էլ իմ ինքնաառաջադրումը չի նշանակում, որ կուսակցությունը չի սատարում: Կուսակցության կողմից առաջադրվելը պարտադիր պայման չէ: Ավելին, երբ խոսքը տեղական ինքնակառավարմանն է վերաբերում, դա պետք է լինի միայն ապաքաղաքական, այսինքն` քաղաքականությունը ՏԻՄ–ի հետ կապելը անընդունելի է, հենց այդ է պատճառը, որ ես ինքնաառաջադրվել եմ»,-ասում է ավագանու աթոռի համար կրկին պայքարի ելած Այվազյանը:
Նրա համոզմամբ` Վանաձորում կան բազմաթիվ խնդիրներ, որոնք հիմնավոր լուծման կարիք ունեն:
«Փորձելու ենք քաղաքային մարզադաշտը ցանկացած ձեւով վերադարձնել մեր համայնքին, եթե դա հնարավոր է: Աղբահանության խնդիրը մեր քաղաքում շատ լուրջ է, որ դեռ լուծված չէ, եւ այդ խնդիրը հիմնավոր լուծման կարիք ունի: Քաղաքում շատ լուրջ խնդիր ունենք անսարք վերելակների եւ տանիքների հետ կապված»,-այս եւ այլ լուծում պահանջող հարցերին անդրադառնալով` Այվազյանը նշեց, որ ինքնաառաջադրումն ուղղված է հենց դրանց լուծմանը:
Կարդացեք նաև
Անուշ ԲՈՒԼՂԱԴԱՐՅԱՆ
Վանաձոր
