Հայ կազակական բարեկամության եւ համագործակցության միջազգային միավորում հ/կ-ն այսօր հայտարարեց առաջիկա նախագահական ընտրություններում ՀՀ նախագահ, ՀՀԿ թեկնածու Սերժ Սարգսյանին սատարելու մասին:
«Հաշվի առնելով Հայաստանի ներկայիս խնդիրները, մարտահրավերները, այդ թվում ՀՀ սահմանադրական կարգի եւ օրինականության պահպանման, ամրապնդման եւ ՀՀ, ԼՂՀ անվտանգության ամրապնդման , պետական կառավարման ոլորտում առավելագույն փորձառություն ունեցող ղեկավար ունենալու անհրաժեշտությունը` կազմակերպության նախագահության նիստում որոշվել է պաշտպանել գործող նախագահի թեկնածությունը»,- այսօր «Հայելի» ակումբում ասաց հ/կ գլխավոր շտաբի պետ, կազակական զորքերի գեներալ Սարգիս Աղաբեկյանը:
Ըստ նրա, առաջադրված թեկնածուներից արժանավորներն են Րաֆֆի Հովհաննիսյանն ու Հրանտ Բագրատյանը, բայց նախընտրում են Սերժ Սարգսյանին հենց ամենափորձառու համարելու համար. «Նշված 5 տարիները զարգացել են խաղաղության պայմաններում. եւս 5 խաղաղ տարի, նշված տարիները զերծ են եղել հասարակական ցնցումներից, թե տնտեսության, թե պաշտպանական ոլորտում: Մեծ քայլեր են կատարվել սահմանադրական օրինականության ամրապնդման ոլորտում, մեծ ձեռքբերումներ կան»:
Կազակների հ/կ-ն մոտ 6000 անդամ ունի եւ նախորդ նախագահական ընտրություններին էլ սատարել է Սերժ Սարգսյանին:
Արփինե ՍԻՄՈՆՅԱՆ
