Այսօր Նկարիչների միությունում մեկնարկեց «Արևավիշապ» գրաֆիկական հումորի առաջին միջազգային փառատոնը` հայ գրատպության 500-ամյակին նվիրված միջոցառումներն ավարտվելու կապակցությամբ:
Aravot.am-ի հետ զրույցում Հայաստանի երգիծանկարիչների ասոցիացիայի անդամ, միջազգային մրցույթների դափնեկիր Պավել Ջանգիրովը հայտնեց, որ փառատոնի թեման գիրքն է. «Մասնակցում է 265 նկարիչ` աշխարհի 52 երկրից: Հետաքրքիր է, որ մասնակցում է 66 նկարիչ Իրանից, 33-ը` Չինաստանից, 17-ը` Ռուսաստանից, 15-ը` Ուկրաինայից, բայց եթե դրոշակներին չնայենք, չենք զգա տարբերություն, որովհետեւ սա ինտերնացիոնալ հումոր է` չնայած կա «տեղական հումոր» հասկացությունը: Ընդհանուր առմամբ, ստացվել է շուրջ 2000 աշխատանք, իսկ այսօր ցուցադրվում են լավագույնները»:
Պարոն Ջանգիրովի խոսքով. «Փառատոնին մասնակցությունն ապացուցում է, որ Հայաստանը ոլորտում հեղինակություն ունի աշխարհում: Մեր երգիծանկարիչներին արտասահմանում ավելի մեծ ուշադրություն են ցուցաբերում, քան այստեղ, մինչդեռ հումորը լուրջ բան է: Աշխարհում կան թանգարաններ, որոնցում հումորային աշխատանքներ են ներկայացված, ինչը հումորի հանդեպ լուրջ վերաբերմունքի մասին է խոսում»:
Երգիծանկարչի դիտարկմամբ` «Հայաստանում երգիծանկարչության ժանրը կայացած է, սակայն պետք է ուշադրության արժանանա եւ ֆինանսավորվի: Իրանում, օրինակ, երեք հումորային ամսագիր է հրատարակվում, մինչդեռ մեզանում` միայն «Ոզնի» երգիծաթերթը. հումորը պետք է տպագրվի եւ ցուցադրվի»:
Կարդացեք նաև
Պավել Ջանգիրովն ասաց, որ փառատոնին ներկայացրել է 10 աշխատանք, որոնց մի մասը ներկայացված են նաեւ միջազգային մրցույթներում, իսկ մի քանի երգիծանկար էլ հատուկ այս ցուցահանդեսի համար են արվել: Ներկայացնելով երգիծանկարներից մեկը, որում «Աստված» եւ «հրեշտակները» ծիծաղում են Աստվածաշունչ ընթերցելիս, պարոն Ջանգիրովը մեկնաբանեց. «Աշխարհում ամենահայտնի գիրքն Աստվածաշունչն է: Աստված կարող է կարդալ այն: Իսկ եթե կարդա, ի՞նչ ռեակցիա կարող է տալ: Ի վերջո, կարող է ծիծաղել, չէ՞»:
Հավելենք, որ փառատոնն անց է կացվում ՀՀ մշակույթի նախարարության աջակցությամբ: Աշխատանքները Նկարիչների միությունում կցուցադրվեն մինչև ապրիլի 7-ը: Մրցանակաբաշխությունը կկայանա նույն օրը:
Լուիզա ՍՈՒՔԻԱՍՅԱՆ
