Այս պահին Դանիել Վարուժանի անվան դպրոցում տեղակայված 7/26 ընտրատեղամասում հաշվում են քվեաթերթիկները:
Ընտրատեղամասը փակվելուց հետո տեղամաս մտավ ԲՀԿ-ի ավագանու թեկնածու Վլադիմիր Կոստանյանը եւ նստելով հանձնաժողովի նախագահի գլխավերեւում՝ հորդորեց հաշվել քվեաթերթիկները: Նա ժամանակ առ ժամանակ դիտողություն էր անում հանձնաժողովի նախագահին, որ երբ տուփից հանում է ԲՀԿ-ի թերթիկը, բարձր ձայնով ասի ԲՀԿ:
Մի շարք անվավեր քվեաթերթիկներ են դուրս եկել, հիմնական խաչ քաշած բոլորի վրա: Անվավեր քվեաթերթիկներից ոմանց վրա ընտրողը երկու անգամ է նշում արել՝ եւ թվի վրա եւ քվեարկության վանդակում:
Քվեաթերթիկներից մեկում էլ ընտրողը իր համար նշել էր 8-րդ տողը եւ վրան գրել՝ «Ընտրում եմ Րաֆֆի Հովհաննիսյանի պապային, բայց անունը չգիտեմ»: Հանձնաժողովի ՀՀԿ-ի անդամը թույլ չէր ուզում տալ, որ այդ քվեաթերթիկը նկարենք: Նրա գնահատմամբ՝ «ապուշություն են գրել»:
Կարդացեք նաև
Մի քվեաթերթիկների վրա էլ ընտրողը բոլոր տողերի վրա գրել էր Տարոն Մարգարյան ու ձեւավորել քվեաթերթիկը Մարգարյան ազգանունով: Ըստ հանձնաժողովականների, ընտրողն այդպես իր սերն է արտահայտել քաղաքապետի նկատմամբ:
Մեծ ոգեւորությամբ ընդունվեց «Առաքելություն» կուսակցության առաջին եւ առայժմ միակ քվեաթերթիկը:
Հռիփսիմե ՋԵԲԵՋՅԱՆ
