Բոստոնի մարաթոնի պայթյունն իրականացնողների հորեղբայրը՝ Ռուսլան Ցարնին, որն իր եղբորորդիների ծայրահեղականացման մեջ մեղադրել էր մահմեդականություն ընդունած Միշա անունով հայի, վերջերս զանգահարել էր «Արմենիան միրոր-սփեքթաթոր» թերթի խմբագրություն և ներողություն խնդրել հայերից. «Հայաստանը հզոր մշակույթ ունի, հետևաբար ես ուզում եմ շեշտել, որ նրա [Միշայի] ազգային պատկանելիությունը ոչ մի կապ չունի: Երնեկ երբեք ասած չլինեի դա», – ասել էր նա:
«Կալիֆորնիա կուրիեր» թերթի խմբագիր Հարութ Սասունյանը «Ասպարեզ» թերթում գրում է, որ նա Ցարնիին առաջարկել էր հեռուստատեսությամբ կրկնել ներողությունը, ինչին նա տվել էր իր համաձայնությունը, սակայն ավելի ուշ մերժել է՝ պնդելով, որ իր նախկին հայտարարությունները ճիշտ են եղել:
Ինչպես նաև ասել է, որ «Արմենիա միրոր-սփեքթաթոր»-ը իր խոսքերը սխալ է մեջբերել. «Ես երբեք չեմ ասել «Երնեկ երբեք ասած չլինեի դա: Ես ասել եմ, որ հայերի անունը օգտագործելիս մտադրություն չունեի նրանց կապելու պայթյունի հետ: Ես խոսել եմ կոնկրետ անձի մասին, որի մասին ինձ պատմել էին և այդ տեղեկությունը հաստատվել է»:
Հարութ Սասունյանը գրում է. «Ինչո՞ւ Ցարնին ներողություն խնդրեց «Արմենիան միրոր-սփեքթաթոր»-ից, իսկ հետո պնդեց, թե իրեն սխալ են մեջբերել: Հնարավո՞ր է այնպես եղած լինի, որ լրատվամիջոցներում արած իր հայտարարությունների համար զղջացել է, իսկ հետո հետ է կանգնել, երբ «անհայտ ինչ-որ մեկը» խորհուրդ է տվել ներողություն չխնդրել հայերից:
Կարդացեք նաև
Ինչո՞ւ սկզբում իր վրա պատասխանատվություն վերցրեց ներողություն խնդրել հայերից հիմնական հեռուստակայաններով, իսկ հետո հրաժարվեց:
Այս անպատասխան հարցերից կարելի է միայն ենթադրություններ անել հորեղբայր Ցարնիի խորհրդավոր շարժառիթների և հանելուկային կապերի մասին»:
Պատրաստեց Հովհաննես ԻՇԽԱՆՅԱՆԸ
