Այսօր «Ելակետ» ակումբում Բնապահպանական Ճակատի (ՀԲՃ) անդամ Տիգրան Զարիկյանը խոսելով մայիսի 28-ին Կանաչ ջոկատի Տավուշի մարզի Գետահովիտ գյուղ կատարած այցի մասին, որտեղ Խաչաղբյուր գետի վրա Իջեւանի արգելավայրի տարածքում կառուցվող 2-րդ փոքր ՀԷԿ-ի պատճառով գյուղացիներն իրենց անհամաձայնությունն են հայտնում, ասաց. «Գնացել էինք ուսումնասիրելու թե ինչ խնդիրներ կան այնտեղ: Ականատես եղանք, թե ինչպես են ճնշումներ գործադրվում գյուղացիների վրա, մարդիկ ճնշված էին, մեկն ասում էր՝ չեմ ուզում տղաս աշխատանքից զրկվի, քանի որ, եթե բողոքեր` կազատեին աշխատանքից, մյուսը` զգում ես, որ դեմ է, բայց չի ուզում խոսել, որովհետեւ վախենում է թշնամությունից, մեսիջներ էին մեզ տալիս, ահավոր վիճակ էր… Տեսանք մի պատկեր, որը ամիսներ առաջ այլ էր` գյուղացիներն առաջ ուզում էին արժանավայել ապրել, իսկ այսօր նրանց մոտ այլ մոտեցում էր: Հենց գյուղում ականատես եղանք ճնշումների, մինչեւ անգամ մեզ վրա ճնշումներ գործադրելու փորձ արվեց»:
Զարիկյանի խոսքով` ամեն ինչ բարձիթողի վիճակում է, ինչպես կարելի է արգելանոցում վերցնել ու ՀԷԿ սարքել, գյուղացիները քաջ գիտակցում էին, որ դա իրենց վնաս է, սակայն ոչինչ չէին կարող անել. «Պետական մարմինների անգործության խնդիր կա: Գյուղում ինչ որ լուսավորության, ասֆալտապատման գործեր են արվել, ու դա արել է մի կազմակերպություն, որն անօրինական գործողություններ է ծավալում, իհարկե դա արել է ցույց տալու համար, որ ինչ որ բան է անում ու հետո շարունակի իր անօրինականությունները»:
Եվա ՀԱԿՈԲՅԱՆ
