Ազգային անվտանգության ծառայությունը հաղորդագրություն էր տարածել այն մասին, որ քննչական վարչությունում մայիս 17-ին հարուցվել է քրեական գործ՝ ՀՀ քրեական օրենսգրքի 35-104 հոդվածի 2-րդ մասի 7-րդ և 8-րդ կետերի (մի խումբ անձանց կողմից շահադիտական դրդումներով սպանության նախապատրաստություն) հատկանիշներով: Մայիսի 20-ին Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանի որոշմամբ էլ երկամսյա կալանքի որոշում է կայացվել Արսեն Ավետյանի նկատմամբ, որը մոսկովաբնակ քաղաքագետ, նույնպես կալանված Արկադի Վարդանյանի հետ կասկածվում է սեփական հոր սպանությունը նախապատրաստելու մեջ:
Լրատվամիջոցներում օրեր առաջ տեղեկատվություն տարածվեց այն մասին, որ Արկադի Վարդանյանը հրաժարվել է ՀՀ փաստաբանների պալատի անդամ Նարինե Ռշտունուց:
«Ինչն էր պատճառը, որ Արկադի Վարդանյանը հրաժարվել է Ձեզնից» ,-հարցով էլ դիմեցինք փաստաբան Նարինե Ռշտունուն:
-Նշեմ, որ ինձ հրավիրել էր հենց ինքը` Արկադի Վարդանյանը, իսկ իմ ծառայություններից հրաժարվեց Վարդանյանի որդին` Գեորգի Վարդանյանը, որը ինձ նամակով հայտնեց, որ Վարդանյանի կինը` Ելենան, որը բնակվում է Իսպանիայում, իր ծանոթների միջոցով գտել է այլ փաստաբան:
Կարդացեք նաև
– Հասցրե՞լ է Արկադի Վարդանյանը փոխանցել իրեն առաջադրված մեղադրանքի հետ կապված որոշակի տեղեկատվություն:
-Մայիսի 21-ին, ժ. 20-ի կողմերը ես գտնվել եմ ԱԱԾ-ում, հաջորդ օրը` մայիսի 22-ին Վարդանյանի նկատմամբ խափանման միջոցն էր ընտրվել:
Մայիսի 27-ին հրաժարվեցին: Բնականաբար, հարազատներին հայտնել եմ մեղադրանքի մասին, այնքանով, որքանով դա չէր խախտում նախաքննության գաղտնիքը, քննարկել ենք նաև կալանքի որոշման բողոքարկման անհրաժեշտությունը:
–Ձեր համար ասվում էր, որ չեք հասցրել բողոք բերել:
-Այո, մամուլում տարածվել է, որ ես չեմ հասցրել բողոքարկել, սակայն բողոքը պատրաստ էր, եւ դեռ 2 օր կար: Իմ ծառայություններից հրաժարվեցին և հայտարարեցին, որպեսզի այլևս չզբաղվեմ գործով, այնպես որ ոչ թե ես չեմ հասցրել, այլ դա հաճախորդի կամքն էր:
Ռուզան ՄԻՆԱՍՅԱՆ
