Սյունիքի մարզպետ Սուրիկ Խաչատրյանին մարզպետի պաշտոնից ազատելու եւ նրա նկատմամբ քրեական գործ հարուցելու պահանջով այսօր կառավարության շենքի դիմաց մի խումբ քաղաքացիներ բողոքի ակցիա էին նախատեսել:
Հենց բողոքի գալու ճանապարհին էլ իմացել էին մարզպետի հրաժարականը կառավարության կողմից հաստատելու մասին:
Ակտիվիստ Դավիթ Սանասարյանի խոսքերով. «Հիմա ասում են` գործից ազատել ենք, էլ ինչ եք ուզում , էդ մարդը մեղք չունի, տղան է հանցագործ, թե թիկնապահը: Բայց մենք ասում ենք` չէ, էդ մարդն է ստեղծել իրավիճակը: Ոնց որ Նեմեցն էր ստեղծել, նենց էլ Լիսկան: Կոնկրետ իր շրջապատին տվել է այնքան լիազորություններ, որ կարողանան մարդ էլ կրակել, մարդ էլ ծեծել, ապտակել: Ավետիս Բուդաղյանն ուղղակի եկավ ու հարձակվեց իր տան վրա՞: Մարդուն նվաստացրել են, որ եկել է պատասխան պահանջի»:
Նա օրենքի կոպիտ խախտում է համարում մարզպետարանի երեկ տարածած հաղորդագրությունը, որը պատմում էր Գորիսի կրակոցներն արձանագրած տեսագրության մասին: Ակտիվիստները պատրաստվում են մարզպետարանի տարածած հաղորդագրության վերաբերյալ այսօր հանցագործության մասին հաղորդում ներկայացնել:
Կարդացեք նաև
Ակտիվիստներից մի կին էլ զարմացել է, թե ինչ էր անում տանը Սյունիքի մարզպետի տասնիննամյա որդին. «Նա էդ ժամանակ պետք է բանակում լիներ: Թե՞ որ Լիսկայի տղան է, պետք է իշխանությունները համակրանքով վերաբերվե՞ն»:
Արփինե ՍԻՄՈՆՅԱՆ
