Արեւելյան գործընկերության շրջանակներում Եվրամիությունը պատրաստվում է ֆինանսավորել համագործակցության ծրագիր Հայաստանի ու Վրաստանի , մասնավորապես Շիրակի մարզի, Տավուշի, Լոռիի, Վրաստանից էլ՝ Սամցխե-Ջավախքի ու նաեւ Քվեմո Քարթլիի մարզերի միջեւ: Թե ի՞նչ ոլորտում կլինի համագործակցությունը` տնտեսական, մշակութային կամ այլ բնագավառում, ու ինչքա՞ն կկազմի ծրագրի արժեքը, դեռեւս հայտնի չէ:
Այս նպատակի համար հայտարարվելու է մրցույթ, այսինքն, գրանտ է տրամադրվելու այն կազմակերպությանը, որը գործընկեր կկարողանա փնտրել Վրաստանում: Այս մասին այսօր Գյումրու լրատվամիջոցներին տեղեկացրեց Արեւելյան գործընկերության տարածաշրջանային համագործակցության ծրագրի փոխանակման խմբի ղեկավար Ալեքսեյ Սեկարեւը: Նա ասաց, որ ծրագրերն իրականացվելու են Արեւելյան գործընկերության անդամ 6 երկրների միջեւ`Հայաստանի, Վրաստանի, Ադրբեջանի, Բելառուսիայի, Մոլդովայի եւ Ուկրանիայի միջեւ: Դրանք կնպաստեն տվյալ տարածքի, օրինակ` կոնկրետ Շիրակի մարզի զարգացմանը, տեղի իշխանությունների ու լրագրողների շփմանը, երկխոսությանը:
Եվրամիությունն այս գործընկերության շրջանակում նպատակ ունի իրացնել 4 ծրագիր` ընդհանուր 12,5 միլիոն եվրո արժողությամբ, որոնք կնպաստեն միջսահամանային համագործակցությանը` Հայաստան-Վրաստան, Ադրբեջան-Վրաստան, Բելառուսիա-Ուկրանիա եւ Ուկրանիա-Մոլդովա ուղղություններով:
Նշենք, որ ծրագրին կարող են մասնակցել անգամ քաղաքապետարաններն ու գյուղապետարանները, շահույթ չհետապնդող ԶԼՄ-ները, եւ որ ամենակարեւորն է` ծրագիրը շահողը կստանա ֆինանսավորման 90 տոկոսը: Ծրագիրը կտեւի երկու տարի, հայտերի ներկայացման վերջնաժամակետը 2014 թվականի մայիսին է:
Նունե ԱՐԵՎՇԱՏՅԱՆ
