«Թող գնան ու ՌԴ փողոցներում ման գան հարբած, ընկած, տակը արած մարդկանց ու կտեսնեն, որ они мычат»,-այսօր լրագրողների հետ հանդիպմանը «Հայացք» ակումբում հայտարարեց «Գլոբալիզացիայի եւ տարածաշրջանային համագործակցության վերլուծական կենտրոնի» նախագահ Ստեփան Գրիգորյանը՝ անդրադառնալով Մոսկվայի մերձակայքում Հրաչյա Հարությունյանի հետ կապված խոշոր ավտովթարին ու նրա նկատմամբ ռուսական կողմի վերաբերմունքին:
Նա նկատեց, որ ՌԴ-ն խնդիրը քաղաքականացնում է ու շարունակեց. «Սպասել, որ կլինի օբյեկտիվ դատավարություն, միամիտ կլինենք: Սա կոչվում է հաշվեհարդար»: Պարոն Գրիգորյանը կարծում է, որ այս հարցերը պետք է հստակ դնենք Ռուսաստանի առաջ:
Ինչ վերաբերում է Հրաչյա Հարությունյանին՝ Հայաստան վերադարձնելու հարցին, պարոն Գրիգորյանը նշեց. «Մենք ՌԴ-ի հետ ունենք ընդհանուր դաշտ, նրանք հետ ունենք ստորագրված փաստաթղթեր ու գիտեմ դեպքեր, երբ մենք իրար օգնել ենք»:
Պարոն Գրիգորյանի համար կարևոր է այն հարցը, արդյոք ավտոբուսի վարորդն ի՞նչ վիճակում է եղել՝ խմա՞ծ, թե՞ ոչ:
Կարդացեք նաև
Փաստաբանների պալատի անդամ, փաստաբան Ռուբեն Բալոյանն էլ տեսանյութը դիտելիս եկել է հետևյալ եզրակացության. «Եթե Կամազը ճակատ ճակատ բախվեր տրանսպորտին, ապա համոզված եմ, որ զոհերի քանակը կլիներ ավելի շատ, քան որ մեր հայրենակիցը իր գործողություններով կարողացել է ճիշտ կողմնորոշվել ձախ թեքվել և մեքենայի բախումը եղել է կիսակողաշրջված վիճակում: Պատկերացրեք, եթե միմյանց դեմ առ դեմ բախվեին: Սա վկայում է վարորդի բազմամյա փորձի մասին»:
Պարոն Բալոյանը տեղեկացրեց. «Ես Հարությունյանին պաշտպանելու համար գումար չեմ պահանջում: Ուղղակի Մոսկվայում պաշտպանություն իրականացնելը կապված է որոշակի ծախսերի հետ: Ինձ արդեն զանգահարել են բազում քաղաքացիներ ՀՀ-ից, Մոսկվայից, Սանկտ Պետերբուրգից, ու բազմաթիվ առաջարկներ կան»:
Aravot.am-ը պարոն Գրիգորյանից հետաքրքրվեց՝ համամի՞տ է այն կարծիքին, որ ՌԴ վերնախավում այս միջադեպն օգտագործում են, որպես ճնշում ՀՀ-ի նկատմամբ՝ մասնավորապես Եվրասիական Միության անդամագրման համատեքստում: Պարոն Գրիգորյանը պատասխանեց. «Այս կամպանիան, գազի թանկացումը կապ չունի Ձեր նշած խնդիրների և մեր՝ Եվրոպայի հետ աշխատանքների հետ: Սա կապված է նրա հետ, որ ՌԴ-ն միգրանտների հետ խնդիր ունի, հազարավոր միգրանտներ են տարբեր երկրներից, ՌԴ-ն էլ հոգնում է դրանից: Սա վառ դեպք է և սրանով ռուսները փորձեցին միգրանտների դեմ ալիք բարձրացնել: Անպայման չէ, որ հայերի դեպքում է նպատակաուղղված, այլ պարզապես Ռուսաստանն ունի լուրջ խնդիրներ միգրանտների հետ»:
Տաթև ՀԱՐՈՒԹՅՈՒՆՅԱՆ
