Վարչապետ Տիգրան Սարգսյանն ընդունել է Հայ մարմնակրթական ընդհանուր միության (Հ.Մ.Ը.Մ.) կենտրոնական վարչության անդամներին, ովքեր Հայաստան են ժամանել Հ.Մ.Ը.Մ. 9-րդ մարզախաղերի անցկացման առիթով:
Ողջունելով հյուրերին և կարևորելով կառույցի դերը հայապահպանության գործում` վարչապետը նշել է. «Միշտ հաճելի է հանդիպել Հայ մարմնակրթական ընդհանուր միության երիտասարդներին: Համոզված ենք, որ հայրենասիրական դաստիարակության ոգին պահպանելու և առաջ մղելու գործը լավագույնս հենց դուք եք իրականացնում: Հավաստիացնում եմ ձեզ, որ Հայաստանի Հանրապետության կառավարությունն ամեն ինչ կանի, որպեսզի լավագույնս կարողանաք այդ առաքելությունն իրականացնել»:
Հ.Մ.Ը.Մ. Լիբանանի ատենապետ Գառնիկ Մկրտիչյանը վարչապետ Սարգսյանին է ներկայացրել հանդիպման մասնակիցներին և ընդգծել, որ իրենց նպատակն է, որպեսզի սփյուռքահայ երիտասարդներն այցելեն հայրենիք: Նա տեղեկացրել է, որ հուլիսի 28-ին «Ազատության» հրապարակում տեղի կունենա Հ.Մ.Ը.Մ. 9-րդ մարզախաղերի բացման հանդիսավոր արարողությունը, որոնք տևելու են մեկ շաբաթ: Այս տարի դրանց մասնակցելու է Հայաստանի և սփյուռքի ավելի քան 600 մարզիկ:
Կարդացեք նաև
Հ.Մ.Ը.Մ. կենտրոնական վարչության անդամները շնորհակալություն են հայտնել Տիգրան Սարգսյանին մարզախաղերի կազմակերպմանն օժանդակելու պատրաստակամության համար, ինչում իրենք բազմիցս համոզվել են և խնդրել են աջակցել նաև բանակավայրերի համար ՀՀ կառավարության որոշմամբ տրամադրված տարածքների բարեկարգման և ընդլայնման հարցում: Նրանք նաև բարձր են գնահատել ՀՀ վարչապետի հանձնարարությամբ ստեղծված միջգերատեսչական հանձնաժողովի աշխատանքներն այդ ուղղությամբ:
Ընդգծելով ազգապահպանության գործում սփյուռքում գործող հայ կուսակցությունների նշանակալի դերը` կառավարության ղեկավարը նշել է. «Մեզ համար կարևոր է Հայ Հեղափոխական Դաշնակցության ամուր լինելը, որովհետև այն իր ուսերին մեծ առաքելություն է կրում: Շահագրգռված ենք, որ մեր ավանդական կուսակցությունները միշտ ուժեղ լինեն, որովհետև ձեր հայապահպան առաքելությանն այլընտրանք չկա»:
ՀՀ կառավարություն
