Օգոստոսի 20-ից ՀՀ նախագահի մրցանակի համար «Լավագույն մարզական ընտանիք 2013» հոբելյանական՝ 10-րդ, մրցույթի մասնակիցները Ծաղկաձորի մարզահամալիրի մարզադաշտում պայքարում են պատվավոր մրցանակներին արժանանալու համար:
Բոլոր տարիքային խմբերում արդեն ավարտվել են խաղային փոխանցումավազք՝ մարմնամարզական օղակներով, 30 մետր փոխանցումավազք՝ փոքր օղակներով մրցույթները: Այսօր ընթացքի մեջ են պարանի ձգում եւ վարժություն բասկետբոլի գնդակով մրցույթները:
«Լավագույն մարզական ընտանիք» մրցույթի հիմնական կազմակերպիչ եւ պատասխանատու, ՀՀ սպորտի եւ երիտասարդության հարցերի փոխնախարար Խաչիկ Ասրյանն Aravot.am-ին ասաց. «Այս տարի նախորդի հետ համեմատած եզրափակիչ փուլին մասնակցող ընտանիքների քանակն ավելացել է՝ ի հաշիվ ընտանիքների մեկ տարիքային խմբի ավելացման եւ հասել 144-ի: Ծաղկաձորում են շուրջ 500 մասնակիցներ, ներառյալ ընտանիքները, մրցավարները, սպորտի եւ երիտասարդության հարցերի նախարարության համապատասխան վարչության աշխատակիցները, պատվիրակությունների պատասխանատու ղեկավարները:
Մրցակցությունն ընթանում է աշխույժ պայքարում. ոչ մի ընտանիք չի ցանկանում պարտվել: Բայց մենք ամեն տարի փաստում ենք, որ այս մրցումները պրոֆեսիոնալ չեն: Դրանք կոչված են՝ մասսայական սպորտը, առողջ ապրելակերպը հայ ընտանիքների առօրյայում արմատավորելու գործընթացը կազմակերպելուն, Հայաստանի տարբեր մարզերում եւ ԼՂՀ-ում ապրող ընտանիքների միջեւ բարեկամական կապեր հաստատելուն: Եվ ինչպես ցույց է տալիս նախորդ տարիների փորձը, բազմաթիվ ընտանիքներ Ծաղկաձորից հեռանալուց հետո սերտ ու ջերմ հարաբերություններ են պահպանում»:
Կարդացեք նաև
Աշոտ ՀԱԿՈԲՅԱՆ
