«Անկախությունից հետո հանրապետության գիտության ոլորտը ենթարկվեց կառուցվածքային եւ կադրային փոփոխությունների: Արդյունքում տեղի ունեցավ եւ շարունակվեց գիտական կադրերի, առաջին հերթին՝ երիտասարդների զգալի արտահոսք գիտության ոլորտից, որոնց մի մասը մեկնեցին արտերկիր, իսկ մյուս մասը՝ այլ աշխատանքներին, որն ավելի վտանգավոր է»,-այսօր գիտության ոլորտում կադրերի ներգրավվածության խնդիրների եւ դրանց իրականացման միջոցառումների մասին լրագրողների հետ հանդիպման ժամանակ նշեց Երիտասարդ գիտնականների խորհրդի նախագահ Գեւորգ Վարդանյանը:
Նրա խոսքով, գիտության ոլորտի կադրային կազմի այդպիսի փոփոխությունները բերեցին գիտության արագ ծերացման: 2012թ.-ին ՀՀ գիտության ոլորտում ընդգրկված գիտական աստիճան ունեցողների թիվը 1991թ.-ի համեմատ կրճատվեց շուրջ 72%-ով, եթե 1991թ.-ին գիտական աստիճան ունեցողների թիվը 9238 էր, ապա 2012-2577 է: Պետք է ստեղծել այնպիսի պայմաններ, որ արտերկրից վերադառնան մեր հայրենակիցները, որն այսօր գրեթե անլուծելի է, եւ երիտասարդ գիտնականների ներգրավվածությունը մեծացնել գիտության ոլորտում.
«Եթե ուզում ենք գիտելիքային տնտեսություն ունենալ, ապա պետք է լուրջ ուշադրություն եւ ֆինանսավորում ունենալ երիտասարդ գիտնականների համար: Գիտությունը «թանկ հաճույք է», ունենք բավականին կրթված երիտասարդ կադրեր, որոնք տպագրվում են բարձր ազդեցության գործակից ունեցող արտասահմանյան մի շարք հեղինակավոր ամսագրերում, իսկ գիտական նախագծերը արժանանում են արտասահմանյան դրամաշնորհային մրցույթների բարձր գնահատականին»:
Անժելա ՇԱՀՈՒՄՅԱՆ
