Երկու տարի առաջ Սերժ Սարգսյանի անմիջական մասնակցությամբ մեծ հանդիսավորությամբ բացվեց Ամասիայի կարի ֆաբրիկան, որը պիտի փրկեր այս տարածաշրջանը դատարկվելուց: Այս գործում մեծ ներդրում ունեին ինչպես հայ-գերմանական «ՎԿՍ Արմենիա» ընկերությունը, այնպես էլ մայրաքաղաքաբնակ մեծահարուստ ամասիացիները, որոնք ՊԵԿ նախագահ Գագիկ Խաչատրյանի գլխավորությամբ բարեգործական հիմնադրամ են ստեղծել ու այս նպատակի համար գումար փոխանցել:
Երկու օր առաջ ամասիացիները Aravot.am-ին տեղեկացրեցին, որ այն այլևս չի աշխատում, ժամանակավորապես դադարեցրել է իր գործունեությունը` աշխատակիցներին հարկադիր պարապուրդի մատնելով: «Մի ամիս ու կես է`մեր կարի ֆաբրիկան ժամանակավորապես դադարեցրել է իր գործունեությունը, ասել են, որ մինչև սեպտեմբերի վերջ հազիվ աշխատի: Հույս ունեն, որ նորից պիտի աշխատեցնեն, բայց դա սուտ է, էնտեղ աշխատողներին ասել են`արի, դիմում գրի, ժամանակավորապես կրճատվի, հետո քեզ նոր կընդունենք: Աշխատողներին հույսով սպասեցնում են, պատճառաբանում են, թե մատերիալը տեղ չի եկել հասել, ճանապարհին է, թող գա, տեղ հասնի, դրանից հետո նոր ձեզ կարող ենք ընդունել, դե տերը դրսի մարդ է , տեղի մարդ չէ, շենքն էր իրանց պետք, առավ, հո մեր դարդը չե՞ն », -նեղսրտեց բնակիչներից մեկը` Հրանտ Գրիգորյանը:
Հիշեցնենք, խոսքը այն կարի ֆաբրիկայի մասին է, որին, ըստ տարածված լուրերի, փորձում էր փայատեր դառնալ նաև Սերժ Սարգսյանի եղբայր Սաշիկ Սարգսյանը:
Կարդացեք նաև
Նունե ԱՐԵՎՇԱՏՅԱՆ