«ՀՀԿ-ի եւ առհասարակ ՀՀ իշխանությունների կարծիքն այս հարցում անփոփոխ է`Հայաստան-Թուրքիա հարաբերություններում մեզ համար անթույլատրելի է ցանկացած նախապայման: Ավելին, անթույլատրելի է այս խնդիրը կապել ԼՂՀ խնդրի կարգավորման հետ»,- այսօր ՀՀԿ ԳՄ նիստից հետո պատասխանելով լրագրողների հարցերին ասաց ՀՀ ԱԺ փոխնախագահ Էդուարդ Շարմազանովը` հակադարձելով Թուրքիայի արտգործնախարար Ահմեդ Դավիթօղլուի արած այն հայտարարությանը, որ չի բացառվում, որ 2015 թվականին բացվի հայ-թուրքական սահմանը, բայց մի պայմանով, երբ հայերը դուրս գան ԼՂՀ-ից:
Շարմազանովը նաեւ հավելեց. «Հայերը ապրել, ապրում եւ պետք է ապրեն ԼՂՀ-ում մի պարզ պատճառով, որ ԼՂՀ-ն մեր ժողովրդի սուրբ հայրենիքի մի մասն է»:
Անդրադառնալով մամուլի այն հրապարակումներին էլ, որ Ադրբեջանը Բաքվով ճանապարհ է կառուցում դեպի Նախիջեւան` օգտագործելով քրիստոնեական գերեզմանաքարեր, Շարմազանովն ասաց, որ դա Բաքվի պաշտոնական քաղաքականության հետեւանքն է. «Երբ մի պետության ղեկավարությունն ամբողջ օրը, տարիների ընթացքում ռասիզմ է քարոզում իր ժողովրդի շրջանում, բնականաբար, այդ ռասիստական տրամադրությունենրը պետք է ազդեն հասարակության մի մասի գիտակցության վրա»: Այդ ամենը Շարմազանովը համարում է վանդալիզմի դասական օրինակ` մեղադրելով նաեւ միջազգային կառույցներին եւ իրավապաշտպան կազմակերպություններին`ժամանակին Ջուղայի խաչքարերի նկատմամբ ադրբեջանական իշխանությունների իրականացրած վանդալիզմին համաչափ չարձագանքելու համար, քանի որ, այդ պարագայում, այսօր նման վանդալիզմը չէր կրկնվի:
Նելլի ԳՐԻԳՈՐՅԱՆ
Լավ էլ ճառ ասել գիտի. տեսնես իրականում իր կարծիքը համընկնո՞ւմ է իր ճառի կարծիքին: Պատկերացնում եմ, որ տանը նստած՝ ծիծաղում է ինքն իր ասածի վրա: Ու մեզ վրա: