ՀՀ արտգործնախարարության մեր աղբյուրը պնդում է, որ Հայաստանը մշակել է հայ-թուրքական հարաբերությունների կարգավորման նոր ճանապարհային քարտեզ, որը փակ խողովակներով 10 օր առաջ փոխանցվել է անձամբ Ահմեդ Դավութօղլուին: Ակնհայտ է, որ «Զրո խնդիր՝ հարեւանների հետ» կարգախոսով սկսած եւ ներկա դրությամբ «լուրջ խնդիրներ՝ բոլոր հարեւանների հետ» իրողության հասած Էրդողանի կառավարությունը միջազգային հարթակներում դիմագիծը փրկելու մեծ խնդիր ունի եւ, ըստ էության, դեմ չի եղել Հայաստանի կողմից առաջադրված ճանապարհային քարտեզը գաղտնիության պայմաններում լրջորեն քննության առնելու: Նույն աղբյուրը պնդում է, որ ճանապարհային քարտեզը երեք կոնկրետ հանգրվանի մասին է:
ԱԳՆ մեր աղբյուրների տեղեկացմամբ՝ Հայաստանը գաղտնի խողովակներով Թուրքիայի արտգործնախարար Ահմեդ Դավութօղլուին է փոխանցել հայ-թուրքական հարաբերությունների կարգավորման ճանապարհային քարտեզ՝ երեք կոնկրետ կետերով.
1. Թուրքիան հրապարակավ ընդունում է Հայոց ցեղասպանության փաստը, իր պատասխանատվությունը եւ ապաշխարում աշխարհասփյուռ հայության առջեւ:
2. Անհապաղ բացում է Հայաստան-Թուրքիա սահմանը եւ դիվանագիտական հարաբերություններ հաստատում Հայաստանի հետ:
Կարդացեք նաև
3. Դրանից հետո ԼՂՀ հիմնախնդրի կարգավորման հարցում Թուրքիան կարողանում է հանդես գալ խաղաղարար ջանքերով եւ իրավունք է ստանում հասարակական ծրագրեր իրականացնել պատերազմի հռետորության վերահսկման, սահմանային միջադեպերի կանխման, դիպուկահարների հետքաշման եւ հասարակություններին խաղաղության պատրաստման ոլորտներում:
Ենթադրվում է, որ Դավութօղլուի երեւանյան այցի շրջանակներում նա հնարավորություն կունենա Էդվարդ Նալբանդյանին տեղեկացնել պաշտոնական Անկարայի դիրքորոշումը Հայաստանի կողմից առաջ քաշված ճանապարհային քարտեզի վերաբերյալ:
Սեփ.լր.
«Առավոտ» օրաթերթ
