Այսօր ՀՀ պաշտպանության նախարար Սեյրան Օհանյանը այցելեց ՀՀ ՊՆ կենտրոնական հավաքակայան, ձմեռային զորակոչի ընթացքին ծանոթանալու նպատակով:
Այս զորակոչը մյուսներից առանձնանում է նրանով, որ զինակոչիկները վիճակահանությամբ էին իրենց զորամասերը ընտրում: Այս նորամուծությունը նպատակ ունի բացառել հնարավոր բոլոր կոռուպցիոն ռիսկերը՝ կոնկրետ զորամասերի ընտրության հարցում:
Վիճակահանության համար դրված էր երեք տուփ, որոնցից մեկի վրա գրված էր Ա, մյուսի վրա՝ Մ, երրորդի վրա՝ Ը: Ա տառով տուփի մեջ շատ քիչ էին թերթիկները, քանի որ այս տուփից թերթիկ ընտրելու իրավունք ունեին սոցիալական արտոնություններ ունեցողները, նրանք, ովքեր այս կամ այն պատճառով իրենց բնակավայրի մոտ տարածքում կարող են ծառայել: Մ տառով արկղում «մասնագետների»՝ բուհական կրթություն ունեցող կամ որեւէ այլ կերպ մասնագիտացում ստացածների համար նախատեսված թերթիկներն էին, սակայն ամենաշատ թերթիկները Ը՝ «ընդհանուր» տուփի մեջ էին:
Զորակոչիկները հանում էին թղթիկները, որոնց վրա գրված էր համապատասխան զորամասի կոդը: Այդ համարը զինվորը բարձրաձայն կրկնում էր տեսասարքի առջեւ, ապա այն միանգամից անցկացվում էր համակարգիչ, եւ այն փոփոխելու որեւէ հնարավորություն բացառվում է: Վիճակահանությանը զինակոչիկներից բացի ներկա էին նրանց ծնողները:
Նախարարը բարի ծառայություն եւ խաղաղություն մաղթեց զինվորներին, պատասխանեց նրանց ծնողների հարցերին:
Մանրամասները՝ տեսանյութում:
Մելանյա ԲԱՐՍԵՂՅԱՆ
