Շիրակի մարզի ընդհանուր իրավասության դատարանում այսօր նշանակված էր Գյումրու նախկին քաղաքապետ Վարդան Ղուկասյանի դստեր փեսացուի` Կարեն Եսայանի սպանության գործով դատական նիստը: Մոտ մեկ տարի քննվելուց հետո այն արդեն մոտեցել է ավարտին. այսօր դատախազ Արմեն Մարուքյանը հնչեցնելու էր մեղադրական ճառը` պատժաչափ պահանջելով ամբաստանյալ Հարություն Սարգսյանի համար, սակայն ոչ դատախազն էր եկել, ոչ Հարություն Սարգսյանի պաշտպանները, ոչ էլ ամբաստանյալին էին ԱԱԾ-ի մեկուսարանից Գյումրի հասցրել:
Դատավոր Մարտին Սարոյանը այս անգամ ճիշտ ժամին սկսելով դատական նիստը` քարտուղարից հետաքրքրվեց, թե Երևանից Գյումրի տեղափոխե՞լ են արդյոք ամբաստանյալին, սակայն վերջինս ասաց, որ ոստիկանները դեռ ոչինչ չեն զեկուցել այս թեմայով: Դատավորը նշելով, որ դատախազն ու փաստաբանները անհարգալից բացակայել են , դատական նիստը հետաձգեց երկու օրով:
Հիշեցնենք, որ Անիի նախկին ոստիկանապետի որդին` Հարություն Սարգսյանը, մեղադրվում է ՀՀ Քրեական օրենսգրքի 104 հոդվածի 1-ին մասով, այն է` «Սպանությունը` ապօրինաբար մեկ ուրիշին դիտավորությամբ կյանքից զրկելը` պատժվում է ազատազրկմամբ` ութից տասնհինգ տարի ժամկետով» և 188 հոդվածի 1-ին մասով `ապօրինի ձեռնարկատիրությունը ծավալելու համար: «Առանց պետական գրանցման, հաշվառման (բացառությամբ oրենքով նախատեսված դեպքերի) կամ առանց հատուկ թույլտվության (լիցենզիայի) լիցենզավորման ենթակա կամ օրենքով արգելված ձեռնարկատիրական գործունեություն իրականացնելը, որը զուգորդվել է անձանց կամ կազմակերպություններին կամ պետությանը զգալի վնաս պատճառելով` պատժվում է տուգանքով` նվազագույն աշխատավարձի հինգհարյուրապատիկից հազարապատիկի չափով, կամ կալանքով` մեկից երեք ամիս ժամկետով, կամ ազատազրկմամբ` առավելագույնը մեկ տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` մեկ տարի ժամկետով», -նշված է քրեական օրենսգրքում:
Հիշեցնենք, որ Հարություն Սարգսյանին առաջադրված մեղադրանքի ծավալից հանվեց ապօրինի զենք կրելու մեղադրանքը, որը պատիժ է նախատեսում ՀՀ Քրեական օրենսգրքի 235 հոդվածի 1-ին մասով:
Կարդացեք նաև
Նունե ԱՐԵՎՇԱՏՅԱՆ
