«Դրական եմ գնահատում իմ գործընկերոջ՝ Թևան Պողոսյանի՝ պատգամավորական գործունեությունը շարունակելու որոշումը:Նա խորը պատասխանատվությամբ մոտեցավ»,-այսօր «Հայացք» ակումբում հայտարարեց «Ժառանգություն» կուսակցության փոխնախագահ Արմեն Մարտիրոսյանը: Հարցին ի՞նչն է ազդել նրա այդ որոշման վրա, պարոն Մարտիրոսյանը պատասխանեց. «Առաջին հերթին ազդեց իր՝ խնդիրը նժարի վրա դնելու հանգամանքը, քանի որ խնդիրը անձնական է, որոշումն էլ Թևան Պողոսյանի անձնական որոշումն էր»:
«Ժառանգության» հետ կապված մյուս «ապատեղեկատվության մասին» պարոն Մարտիրոսյանը տեղեկացրեց հետևյալը. «Տեղեկություններ են տարածվել, թե մենք փետրվարի 18-ին հանրահավաք ենք անելու: Բայց դեռ ձևաչափ չենք ընդունել, թե Րաֆֆի Հովհաննիսյանն իր ձևաչափով է խոսք ասելու: Մոտակա օրերին ձևաչափը ձեզ կասենք: Ինչ վերաբերում է նրան, որ Պարույր Հայրիկյանն էլ է նույն օրը Ազատության հրապարակում հանրահավաք կազմակերպում, ապա կանենք այնպես, որ նրան չխանգարենք»:
«Ժառանգության» փոխնախագահը կառավարության գործունեությունը համարեց «հակաբարոյական»՝ մատնանշելով գազի հետ կապված խնդիրները: Ու շեշտեց, որ «իշխանությունն ամբողջությամբ պետք է փոխվի»:
Արմեն Մարտիրոսյանը անընդունելի համարեց ազատամարտիկների ձերբակալությունները և հետապնդումները:
Կարդացեք նաև
Անդրադառնալով ՀՀ-ի Մաքսային միության անդամակցությանը՝ պարոն Մարտիրոսյանը նշեց, որ դա չի բխում ՀՀ շահերից ու մանրամասնեց. «Եթե մի քանի մթերք արտահանելու համար, որը մի քանիսի գրպանն է հարստացնելու, կամ հանքարդյունաբվերությունը զարգացնելու համար ունենալու ենք մեծ գնաճ, ներդրումների բացակայություն, ապա այդ միությունը չի բխում ՀՀ քաղաքացու շահերից»:
«Ժառանգության» յոթ տարվա անդամ Դանիել Իոաննիսյանը մեկ օր առաջ հեռացավ կուսակցությունից՝ պատճառաբանելով, թե հիմնական տարաձայնությունները կուրսի հետ էին:
Այս մասին պարոն Մարտիրոսյանն ասաց. «Ոչ կարող եմ մեղադրել, ոչ ողջունել: Ինքն իր ցանկությամբ դուրս է գալիս, իրեն հաջող հասարակական գործունեություն եմ ցանկանում: Բոլորս էլ հիասթափություններ ապրում ենք: Դանիելի նման մեր կուսակցությունում շատ երիտասարդներ շատ կան»:
Հարցին՝ ո՞ւր է Րաֆֆի Հովհաննիսյանը, պարոն Մարտիրոսյանն ասաց. «Րաֆֆի Հովհաննիսյանը Երևանում է: Եթե ուզում եք տեսնել, ապա կարող եմ կազմակերպել այդ հանդիպումը: Նա մասնակցեց Շանթի հետ կապված երթին, իսկ ո՞ւր էին մյուսները»:
Տաթև ՀԱՐՈՒԹՅՈՒՆՅԱՆ
