Ռուսաստանի մաքսային ֆեդերալ ծառայության ղեկավար Անդրեյ Բելյանինովի կարծիքով` Մաքսային միությանը Հայաստանի միանալու գործընթացում հրատապ խնդիրներից մեկը տեղեկատվական գործակցությունն է: Չորեքշաբթի օրը Բելառուսում, Նովոպոլոցկում տեղի ունեցած նիստին հաջորդած ասուլիսում նա ասել է, թե իրեն ամենաշատը մտահոգում է տեղեկատվության փոխանակման խնդիրը:
«Ռուսաստանի, Բելառուսի և Ղազախստանի մաքսային ծառայությունների շփման լեզուն ռուսերենն է, իսկ Հայաստանում՝ հայերենը», – պարզաբանել է նա՝ հավելելով, թե պետք է շատ լուրջ աշխատանքներ տանել, «այլապես մեկս մյուսին չենք կարող հասկանալ»: «Շատ բան պետք է նորից յուրացնել», – հավելել է Բելյանինովը:
Նրա խոսքերով՝ Հայաստանը «բաց սրտով» աշխատում է Մաքսային միության ապագա գործընկերների հետ:
«Ինտերֆաքս»-ի փոխանցմամբ՝ Անդրեյ Բելյանինովը նաև ասել է, որ ՄՄ-ին Հայաստանի միանալու խիստ ժամկետներ են սահմանված, ենթադրվում է, որ կես տարվա մեջ գործընթացը պետք է առավելագույնը մոտեցնել ավարտին:
Նովոպոլոցկում անցկացվել է ՄՄ-ի մաքսային ծառայությունների կոլեգիայի նիստ, որին դիտորդի կարգավիճակով մասնակցել են նաև Հայաստանի, Ղրղըզստանի և Ուկրաինայի ներկայացուցիչները:
Մանրամասները կարող եք կարդալ՝ «Ազատություն» ռադիոկայանի կայքում
