Այսօր խորհրդարանում երեք ընդդիմադիր`ՀՅԴ, ՀԱԿ, «Ժառանգություն» եւ այլընտրանքային ԲՀԿ-ն այդպես էլ չեկան ընդհանուր հայտարարի`վստահո՞ւմ են հայրենի կառավարությանը, թե՞ ոչ: Հանդիպումը կրկին տեւեց, 1,5 ժամ:
Կառավարությանն անվստահություն հայտնելու թեմայով սա երկրորդ քննարկումն էր: Իսկ նախաձեռնությունը սկսվեց խորհրդարանում գազի հարցով հանձնաժողով ստեղծելու ոչ իշխանական ուժերի նախաձեռնության տապալումից հետո:
Այսօրվա նիստին ներկա էին ԲՀԿ խմբակցությունից Նաիրա Զոհրաբյանը,Վարդան Օսկանյանը, ՀԱԿ–ից` Լևոն Զուրաբյանը և Արամ Մանուկյանը, ՀՅԴ–ից` Արմեն Ռուստամյանը և Աղվան Վարդանյանը, «Ժառանգություն» խմբակցության ղեկավար Ռուբիկ Հակոբյանը և Թևան Պողոսյանը:
Այս անգամ հյուրընկալող կողմը Հայ ազգային կոնգրեսն էր: Հանդիպման ավարտից հետո լրագրողների հարցերին պատասխանեց ՀԱԿ խմբակցության ղեկավար Լևոն Զուրաբյանը, որն ասաց, թե պատրաստվում է հրապարակել 4 ոչ իշխանական ուժերի կողմից հայտարարություն` կապած կենսաթոշակային կուտակային համակարգի պարտադիր վճարումների դեմ պայքարի վերաբերյալ:
Կարդացեք նաև
«Լուրջ քաղաքական իրավիճակ է ստեղծվել ու ընթանում են կարևոր բուռն քաղաքական պրոցեսներ: Մարդիկ սկսել են պայքարել իրենց իրավունքների համար»,- ասաց նա:
Լրագրողներից մեկի դիտարկմանը` թե այսօր չհնչեց գլխավոր հարցի պատասխանը արդյոք առաջիկա քառօրյայում պատրաստվո՞ւմ են ներկայացնել կառավարությանը` անվստահություն հայտնելու հարց, Զուրաբյանը պատասխանեց. «Բնականաբար հարցը քննարկվել է, խմբագրական աշխատանք է ընթանում, երբ լինի վերջնական արդյունքը մենք ձեզ կասենք: Վերջնական արդյունքը դեռևս չկա»:
Հիշեցմանը, թե նախորդ անգամ «Ժառանգություն» խմբակցության ղեկավարն ասել էր, որ մեկ-երկու օրից արդեն ամեն ինչ պարզ կլինի, Լևոն Զուրաբյանը պատասխանեց. «Բանակցությունները շարունակվում են և ոչ մի ավելի բան չեմ կարող ասել:Աշխատանքը առաջ գնացել է, բայց այդ աշխատանքի առաջխաղացման կամ առաջընթացի մասին խոսելն անիմաստ է մինչև չկա վերջնական համաձայնություն: Զինվեք համբերությամբ ու դուք քառօրյայի ժամանակ կունենաք բավականին հետաքրքիր նյութ լուսաբանելու համար»:
Նելլի ԳՐԻԳՈՐՅԱՆ
