Արագ եւ հեշտ պատրաստվող այս քաղցրավենիքը իսկական շոկոլադասերների համար է՝ համեղ, խրթխրթան եւ գեղեցիկ:
Անհրաժեշտ մթերքները
200 գ կարագ
2 տուփ (200 գ) սեւ շոկոլադ՝ 60-80%-անոց
4 ձու
1 բաժակ շաքարավազ
1 բաժակ խառը ընկուզեղեն՝ ցանկալի է կաղին (պնդուկ), սակայն սովորական ընկույզն էլ բավարար է
1 նարնջի քերած կեղեւ (պետք է քերել միայն նարնջագույն հատվածը, սպիտակ մասը դառնահամ է տալիս)
2 ճաշի գդալ նարնջի լիկյոր (այս պահը կարելի է բաց թողնել)
1-2 բաժակ ալյուր
Պատրաստման եղանակը
Կարդացեք նաև
Կարագն ու շոկոլադը հալեցնել ջրային բաղնիքի վրա, այսինքն՝ լցնել կաթսայի մեջ, որը դնել մեկ այլ՝ կիսով չափ ջրով լցված կաթսայի վրա եւ դնել կրակին: Պետք է ուշադիր լինել, որ վրայի կաթսան չհպվի ջրին:
Մինչ շոկոլադն ու կարագը հալվում են, հարել հավկիթները շաքարավազի հետ, քերել նարնջի կեղեւը եւ ոչ շատ մանր կտրատել ընկուզեղենը: Շաքարավազն ու հավկիթները պետք է հարել մինչեւ սպիտակեն:
Վրան զգուշորեն ավելացնել հալված կարագաշոկոլադային խառնուրդը՝ այդ ընթացքում անընդհատ հարելով, որպեսզի շոկոլադի տաքությունից ձուն չեփվի: Ավելացնել կտրատած ընկուզեղենը, նարնջի կեղեւը, նարնջի լիկյորը ու ալյուր այնքան, որ ստացվի միջին պնդության խմոր:
Եթե ցանկանում եք, կարող եք ալյուրն ավելի շատ անել, այնքան, որ ձեռքերին չդիպչող փափուկ խմոր դառնա եւ դրանից գնդիկներ ձեւավորեք: Սակայն ժամանակ չկորցնելու համար կարելի է ուղղակի ամբողջությամբ լցնել ջեռոցի թավայի մեջ, վերջում կտրատել: Թավայի տակը պետք է մի թեթեւ յուղոտել կամ յուղաթուղթ (калька) դնել:
Թխել նախապես 190 աստիճան տաքացրած ջեռոցում: Թողնել լավ սառչի, նոր կտրատել: Թխվածքաբլիթները կարող եք գեղեցիկ կտրատել եւ դնել փոքրիկ տոպրակի մեջ, նվիրել որեւէ մեկին: Այս թխվածքաբլիթները մի քանի օր թարմ կմնան, եթե դնեք փակ տուփի մեջ: Սակայն խիստ կասկածում եմ, որ դրանք ընդհանրապես կմնան:
Ի դեպ, եթե այս խմորի մեջ ավելացնեք 1 բաժակ կաթ եւ մեկ թեյի գդալ սոդա ու այն դառնա թթվասերի խտության խմոր, կարող եք դրանից հրաշալի կեքսեր թխել: Իսկ եթե վրան էլ հալած շոկոլադ քսեք ու զարդարեք նույն ընկույզներով կամ նարնջի կտորներով, կդառնա տնական «քափքեյկ»:
Բարի ախորժակ:
