«Աշխարհի սպորտսմենները շուրջ 3 տարի մարզվում են՝ պարօլիմպիկին մասնակցելու համար, իսկ ես փետրվարից եմ սկսել մարզումները, մինչդեռ մրցումները մարտ ամսին են: Գիտեք, շատ դժվար է՝ ապրում եմ Ղարաբաղի Մոխրաթաղ գյուղում, իսկ մարզումները հնարավոր չէ ամբողջ տարվա ընթացքում կազմակերպել»,- «Առավոտի» հետ զրույցում ասաց Մհեր Ավանեսյանը, որը մոտ մեկ ամսից Սոչիում պարօլիմպիկ խաղերին ներկայացնելու է Հայաստանը: Մհերն այս օրերին Ծաղկաձորում մարզվում է, որպեսզի մեր երկիրը պատվով ներկայացնի: Նա պարօլիմպիկ խաղերին մրցելու է լեռնադահուկային սպորտաձեւում:
Մարզումների ուշ սկսվելու պատճառներից մեկն էլ, Մհերի խոսքերով, եղել է այն, որ իր մասնակցությունը որոշվել է հունվար ամսին, այդ պատճառով էլ մարզումները փետրվար ամսից են:
«Չնայած մարզավիճակս պահպանում եմ, բայց, այնուամենայնիվ, դժվար է մարզվել միայն մրցումներից առաջ»,- ասում է Մհերը:
33-ամյա երիտասարդը 7 տարեկանում կորցրել է 2 ձեռքը՝ պատճառը եղել է բարձր լարման հոսանքալարերին դիպչելը: Ինչպես ինքն է պատմում, 14 տարեկանից զբաղվել է լեռնադահուկային սպորտաձեւով եւ 1998 թվականից ակտիվ մասնակցություն ունեցել բոլոր պարօլիմպիկ խաղերին՝ հասնելով մինչեւ 7-րդ տեղ:
Սահմանափակ ֆիզիկական հնարավորություններ ունեցող մարզիկների մասնակցությամբ մրցախաղերը այս տարի կանցկացվեն մարտի 7-ից մինչեւ 16-ը, որին կմասնակցի նաեւ Մհերը:
Նշենք, որ այս տարի մրցումներին կմասնակցեն 1650 պարօլիմպիկ մարզիկ եւ թիմերի անդամ՝ ավելի քան 45 երկրներից:
Ըստ Մհեր Ավանեսյանի՝ խաղերին իր մասնակցությունը որոշել է Հայաստանի ազգային պարօլիմպիկ կոմիտեն՝ այն բանից հետո, երբ միջազգային պարօլիմպիկ կոմիտեն հայտնել է, որ Հայաստանը կարող է միայն մեկ մասնակից ունենալ:
Այս տարվա պարօլիմպիադային կխաղարկվի 72 մրցանակ 5 մարզաձեւերում՝ դահուկային մրցարշավ, բիատլոն, սլեդջ-հոկեյ, քյորլինգ՝ անվասայլակի վրա, եւ լեռնադահուկային սպորտ:
Ա. ՄԱԹԵՎՈՍՅԱՆ
«Առավոտ» օրաթերթ
