Այսօր Սյունիքի մարզի ընդհանուր իրավասության դատարանում պետք է անցկացվեր ՀՀ սպորտի եւ երիտասարդության հարցերի նախարար Յուրի Վարդանյանի որդու՝ Դավիթ Վարդանյանի հերթական դատական նիստը: Սակայն այսօրվա նիստը հետաձգվեց, քանի որ ամբաստանյալ Դավիթ Վարդանյանը եւ նրա պաշտպան Վահան Հայրապետյանը չէին ներկայացել: Վահան Հայրապետյանը գրությամբ տեղեկացրել էր, որ այսօրվա նիստին մասնակցել չի կարողանալու, քանի որ նույն օրը պետք է մեկ այլ դատական նիստի ներկա գտնվի եւ խնդրեց նիստը հետաձգել: Մեղադրող կողմը համաձայնեց, որպեսզի նիստը հետաձգվի՝ ճիշտ չգտնելով առանց մյուս կողմի ներկայության դատական նիստ անցկացումը:
Դատարանը որոշեց նիստը հետաձգել, հաջորդ դատական նիստը նշանակվեց ապրիլի 18-ին:
Հիշեցնենք, որ մարտի 28-ին կայացած նախորդ դատական նիստի ժամանակ մեղադրող կողմն առաջարկվել էր չավարտել դատաքննությունը՝ չբացառելով նոր միջնորդություններ ներկայացնելու հանգամանքը:
Կարդացեք նաև
Նշենք, որ Դավիթ Վարդանյանին մեղադրանք է առաջադրվել Քրեական օրենսգրքի 215-րդ հոդվածի 2-րդ մասի` թմրամիջոցների մաքսանենգություն, և 268-րդ հոդվածի 3-րդ մասի՝ առանց իրացնելու նպատակի առանձնապես խոշոր չափերով թմրամիջոցներ կամ հոգեմետ նյութերի ապօրինի շրջանառություն, հատկանիշներով:
Մերի ՍՈՂՈՄՈՆՅԱՆ
