«Տիեզերական մասշտաբի մանիպուլյացիաներ են անում մեր իշխանությունները՝ ասելով, թե ի՞նչ է, եթե մարդը զբաղվում է քաղաքական գործունեությամբ, նրա նկատմամբ քրեական գործեր չե՞ն կարող հարուցվել։ Իհարկե, կարող են, բայց դրանք պետք է լինեն հիմնավոր»,- այսօր «Այլընտրանքային նախագծեր» խմբի կազմակերպած՝ «Կալանավորված Հայաստան» թեմայով կլոր սեղան-քննարկման ժամանակ ասաց նախկին իրավապաշտպան Նինա Կարապետյանցը։
Ըստ նրա՝ քաղաքական հետապնդման կարող են ենթարկվել նաև այն մարդիկ, որոնք անմիջականորեն քաղաքականությամբ չեն զբաղվում, սակայն ունեն ընդդիմադիր հայացքներ։
«Քրեական գործ հարուցված լինելու փաստը կամ դատական ակտի առկայությունը բոլոր երեք ատյաններում դեռ չի նշանակում, որ մարդը մեղավոր է կամ հանցագործ։ Ամենավառ օրինակներից մեկը Մարտի 1-ի գործն է։ Գիտեք՝ որքան մարդ կար, որը տարբեր տեսակի պատասխանատվության էր ենթարկվել, և կային նաև դատական ակտեր։ Անցավ տասը տարի, և Մարդու իրավունքների եվրոպական դատարանն այդ մարդկանց վերաբերյալ որոշումներ ընդունեց, որոնցով նրանք արդարացվեցին»,- ասաց Կարապետյանցը։
Կարդացեք նաև
Նինա Կարապետյանցը նկատեց, որ դրանից հետո էլ Հայաստանում չլուծվեց այդ մարդկանց գործերը քննած քննիչների և գործերով ներգրավված դատախազների պատասխանատվության հարցը։
«Իսկ ինչո՞ւ չլուծեցին, որովհետև այդ նույն մարդիկ պետք է նույն գործողություններն իրականացնեին նաև այս իշխանությունների օրոք»,- նշեց նա։
Նրա խոսքով՝ անհրաժեշտ է համակարգված աշխատանք տանել միջազգային գործընկերների հետ։
«Նրանք, ովքեր սատարում են Նիկոլ Փաշինյանի և նրա թիմի հանցագործությունները, լղոզում ու արդարացնում են դրանք, ամենօրյա ռեժիմով համակարգված կերպով շրջում են տարբեր միջազգային կառույցների դռները և ամբողջ գործընթացը ներկայացնում հակառուսական տրամաբանության շրջանակում։ Չմեռանք, այդ օրն էլ հասավ․ պարզվում է՝ ես էլ եմ ռուսամետ»,- եզրափակեց Նինա Կարապետյանցը։
Արփինե ՍԻՄՈՆՅԱՆ
