Քաղաքագետ Արմեն Բադալյանի համար պատահական չէ, որ Սահմանադրական բարեփոխումների հայեցակարգը փոխվեց վարչապետի հրաժարականից մի քանի օր հետո:
«Ամենայն հավանականությամբ ինչ-որ մի քաղաքական գործընթաց է տեղի ունենում Հայաստանում, ու չեմ կարծում, որ հայաստանածին հեղինակներ ունի: Այդ գործընթացի նպատակն է Հայաստանում միակենտրոն նախագահական իշխանության փոփոխությունը խորհրդարանական կառավարման համակարգի ամենավստահելի վարչապետով եւ ավելի վստահելի, ոչ մեկից չվերահսկվող խորհրդարանի միջոցով»,- ասաց քաղաքագետը:
Քաղաքագետը այս բարեփոխումների հետեւում տեսնում է Ռուսաստանին. «Հայաստանը Մաքսային միությանն անդամագրվելու ճանապարհային քարտեզի մոտ 70 տոկոսը կատարել է, մնացել է շատ քիչ տոկոս, որը ժամանակի ընթացքում կկատարի ու ՄՄ անդամ երկրի ղեկավարները պետք է լինեն շատ ավելի վերահսկելի Ռուսաստանի իշխանությունների կողմից: Իհարկե, դա չի նշանակում, որ այսօրվա ղեկավարները վերահսկելի չեն, բայց չպետք է մոռանալ , որ այսօրվա ղեկավարներն այն ղեկավարներն են, որոնք 3,5 տարի որոշակի քաղաքական բանակցություններ են ունեցել Եվրոպայի հետ , ինչը Ռուսաստանը չի ներել ու նրանցից ազատվելու ճանապարհներ են փնտրում»:
Պարոն Բադալյանը չի ցանկանում շտապել իր գնահատականների մեջ ու ասել, որ Սերժ Սարգսյանի պաշտոնավարումը վտանգված է. «Կախված է նրանից, թե վարչապետը քաղաքական ինչպիսի գործառույթներ կիրականացնի: Որովհետեւ հնարավոր տարբերակները երեքն են` ժամանակավոր վարչապետ, երկարաժամկետ վարչապետ, որը բարեփոխված Սահմանադրության արդյունքում կլինի երկրի ղեկավար վարչապետ, երրորդ տարբերակն էլ այն է, որ վարչապետը կմնա մինչեւ վերջ, ապա կփոխարինվի նախագահով: Տեսնենք` վարչապետը ով կլինի, ավելի հստակ եզրակացություններ կանենք»:
Կարդացեք նաև
Ըստ նրա, այս բարեփոխումների արդյունքում Հայաստանը դառնալու է Ռուսաստանի համար հեշտ կառավարելի երկիր:
Արփինե ՍԻՄՈՆՅԱՆ
