Քաղաքացիական ակտիվիստ Վարդգես Գասպարին իր բանկային հաշիվների վրա կալանքի կիրառումը պայմանավորում է իր դեմ հարուցված քաղաքացիական, քրեական ու վարչական գործերի հարուցմամբ:
Նրան բանկից խոստացել են 10 օրվա ընթացքում կալանքի մասին տեղեկություն տրամադրել, բայց դեռ լուր չկա:
Պարոն Գասպարին վստահ է, որ իր քաղաքացիական ակտիվությունը ճնշելու համար են բանկային հաշիվների վրա կալանք դրել. «Բոլոր միջոցներով ճնշում են, սա միջոցներից մեկն է` սկսած ոստիկանական գործակալներից, երիտհանրապետականների լոլիկ ու ձու վրաս շպրտելուց, ինչը Կարեն Ավագյանի ձեռագիրն է»:
Նա դժգոհեց, որ ոստիկանությունը այդպես էլ չպարզեց իրեն հետապնդող երիտասարդներին. «Նույնիսկ հարեւան շենքի տեսախցիկը նկարահանել էր այդ երիտասարդներին, ոստիկանության քննիչը գրել էր, որ նյութերը հետազոտել է, տեսնում է այդ մարդկանց, բայց ոչ մի արդյունք: Ավելին ասեմ, ինձ բերման ենթարկելու դեպքերից մեկի ժամանակ , միեւնույն սենյակում ոստիկանները բերեցին մի կին եւ երկու տղամարդու, եւ ոստիկաններն այդ սենյակից դուրս եկան: Եւ այս մարդիկ հենց ոստիկանության բաժնում ինձ հետ բանավեճ հրահրել ու սադրել, իրենց վրայից ալկոհոլի հոտը փչում էր, ակնհայտ հարբած էին: Սա ոստիկանության ձեռագիրն է ոստիկանության բաժնում եւ բաժնից դուրս»:
Կարդացեք նաև
Արփինե ՍԻՄՈՆՅԱՆ
