Այս պահին Ազգային ժողովում լսվում է «Ակցիզային հարկի մասին» ՀՀ օրենքում փոփոխություն կատարելու մասին օրենքի նախագիծը: Բոլոր ելույթ ունեցողները, ամբիոնին մոտենալով, իրենց պարտքն են համարում սկզբից շնորհավորել ժամեր առաջ 101 ձայնով ԱԺ նախագահ դարձած եւ դրանից հետո որոշակի դժվարությամբ ԱԺ նախագահի բազկաթոռում բազմած Գալուստ Սահակյանին, ապա նոր անցնել իրենց ելույթին:
Յուրօրինակ շնորհավորանքով նրան դիմեց ՕԵԿ խմբակցության պատգամավոր Հովհաննես Մարգարյանը. «Ես էլ եմ ուզում միանալ իմ գործընկերներին եւ շնորհավորել: Ուզում եմ ասել՝ գալդ բարի, բարի Գալուստ Գրիգորիչ»:
Գալուստ Գրիգորիչին շնորհավորեց նաեւ ԱԺ նախագահի քվեարկությունը բոյկոտած երկու ուժերից մեկի՝ ՀՅԴ խմբակցության ղեկավար Արմեն Ռուստամյանը, հույս հայտնելով, որ Գալուստ Սահակյանի՝ ԱԺ նախագահի պաշտոնին անցնելուց հետո, խորհրդարանում հանգիստ եւ խաղաղ աշխատանքային մթնոլորտ կտիրի՝ «իրար կես խոսքից կհասկանանք»:
Մյուս բոյկոտած ուժի՝ ՀԱԿ խմբակցության ղեկավար Լեւոն Զուրաբյանը չշնորհավորեց խորհրդարանի նորընտիր ղեկավարին:
Կարդացեք նաև
Մելանյա ԲԱՐՍԵՂՅԱՆ
