Կապանի տարածաշրջանի Ծավ գյուղի բնակիչների հողատարածքների 80 տոկոսը գտնվում է Ծավ համայնքի վարչական շրջանում ընդգրկված Շիշկերտ բնակավայրում: Գյուղացիների խոսքով` իրենց եկամտի հիմնական աղբյուրն այս գյուղից է գալիս, քանի որ խոտհարքները, արոտավայրերը, կարտոֆիլի ցանքսերն այս բնակավայրում են տեղակայված: Սակայն Ծավ գյուղը Շիշկերտին կապող ճանապարհի մի հատվածը խիստ անմխիթար վիճակում է գտնվում եւ գյուղացիները ստիպված են լինում ամեն անգամ երթեւեկել քարուքանդ ճանապարհով:
«Ճանապարհի վրա վիճակ չկա, 5.5 կմ ասֆալտապատվել է Մեղրի-Ծավ-Կապան ճանապարհահատվածի կառուցման ժամանակ, իսկ մնացած 5.5 կմ նախկին գրունտային ճանապարհն է ու խիստ անմխիթար է: Եթե մենք գյուղացիներով ինչ-որ բարեկարգման աշխատանքներ չանենք, հիմա էդ ճանապարհը վաղուց անանցանելի կլիներ դարձած ու քանդված: Ոչ մի պետական մոտեցում չկա այս հարցում ու հաշվի չի առնվում, որ սահմանամերձ բնակավայր է», – նշեցին գյուղացիները: Խնդրի մասին տարիներ ի վեր բազմիցս է բարձրաձայնվել, սակայն մինչեւ օրս դրական արդյուք չի գրանցվել: Ծավ գյուղական համայնքի ղեկավար Սեյրան Զաքարյանի խոսքով` շատ ավելի լավ կլինի, որ ճանապարհն ասֆալտապատվի, այլապես ամեն անգամ ստիպված են լինում գյուղացիների ուժերով բարեկարգել` բազմաթիվ դժվարությունների բախվելով:
«Ճանապարհը պետք է որոշակի բարեկարգվի, դա մեծ գումարների հետ չի կապված, ընդամենը մեխանիզմ է պետք, որ 2-3 օր աշխատի: Նույնիսկ վառելիքի գումարը գյուղացիներով կհավաքենք, միայն թե մեխանիզմը տան ճանապարհը մի քիչ բարեկարգենք: Կապանի ճամբաժինը օգնեց 100 լիտր վառելիքով, իսկ մենք մոտ 200 լիտր վառելիք ծախսեցինք, մեխանիզմը գտանք բարեկարգման աշխատանքն արեցինք, բայց պետք է գրեդերով հարթեցման, ջրահեռացման աշխատանքներ արվեն, որ գոնե այդ կատարած աշխատանքները մի քիչ երկար ծառայեն: Եթե ընդամենը այդ 5.5 կմ հատվածը ասֆալատապատվի` շատ ավելի լավ կլինի»,- ասաց Ծավի գյուղապետը եւ հավելեց, որ այժմ անմխիթար ճանապարհով երթեւեկելը բազմաթիվ դժվարություն է առաջացնում գյուղացիների համար եւ մեքենաների անսարքության առիթ հանդիսանում: Ի դեպ, Շիշկերտ գյուղով անցնող ճանապարհը դեպի Խուստուփ սար տանող միակ ճանապարհն է, որից օգտվում են նաեւ տարբեր վայրերից տարածաշրջան ժամանած քաղաքացիները: Իսկ Շիշկերտում մշտական 5 ընտանիք է ապրում, ամռան սեզոնին տնտեսությունների թիվը կրկնակի ավելանում է: «Կարեւոր չի, թե գյուղում քանի բնակիչ կա, ժողովուրդը սնվում է այդ հողից եւ պետք է պայմաններ ստեղծեն սահմանամերձ գյուղի բնակիչների կյանքը բարելավելու համար»,- ավելացրեց Ծավ գյուղական համայնքի ղեկավար Սեյրան Զաքարյանը:
Լուսանկարը՝ արխիվային
Մերի ՍՈՂՄՈՆՅԱՆ
