«Այստեղ կա մի աշխատող, որը կրում է պետական համազգեստ, նրանից հարցնում եմ անունն ու ազգանունը, չի ներկայանում: Ամեն անգամ ասում է՝ խոստանում եմ, քո վրա մի հոդված էլ է ավելանալու, ամեն ինչ անելու եմ, որ մի հոդված էլ ավելանա… հայտարարում եմ՝ այստեղ կա KGB-ի բ…զ, գործակալ»,- այսօր դատարանում դատական նիստի ժամանակ հայտարարեց Շանթ Հարությունյանը: Նրան ընդհատեց դատավոր Մնացական Մարտիրոսյանը:
Ամբաստանյալներ Արմեն Հովհաննիսյանի եւ Տիգրան Պետրոսյանի փաստաբան Արա Զաքարյանն էլ ներկայացրեց իր պաշտպանյալ Արմեն Հովհաննիսյանի վերաբերյալ ոստիկան Գեղամ Խաչատրյանի ցուցմունքների հակասությունը:
«Արմեն Հովհաննիսյանը իբր թե հրել է ոստիկաններ Արա Մարտիրոսյանին եւ Գեղամ Խաչատրյանին: Գործում առկա նյութերով չի հիմնավորվում, որ իմ պաշտպանյալը նման գործողություններ է կատարել: Գեղամ Խաչատրյանը իր առաջին ցուցմունքում նշել է, որ Արմենն իրեն հրել է, բայց առերես հարցաքննության ժամանակ ոչինչ չի ասել, ու դա որեւէ ապացույցով, այդ թվում՝ նաեւ տեսագրությամբ չի ապացուցվել: Եթե նրան հրած լիներ, տուժողը առերես հարցաքննության ժամանակ կասեր: Տուժող Գեղամ Խաչատրյանն ասել է, որ ունի գերազանց հիշողություն ու դեպքերի մանրամանսերը լավ հիշում է»,- ասաց պարոն Զաքարյանը:
Նա դատավորին ասաց. «Եթե դուք այսօր էլ պնդեք ձեր մերժման մասին որոշումը, ապա պարտավոր եք բերել ծանրակշիռ պատճառաբանություններ, հակառակ դեպքում սա բացահայտ կամայականություն է»: Արա Զաքարյանը նաեւ պնդեց, որ մերժումը հաստատելու դեպքում, դատարանը պետք է միջնորդի պետբյուջեից գումարներ տրամադրել Արմեն Հովհաննիսյանի երեք անչափահաս երեխաների ապրուստը հոգալու համար, քանի որ այդ ընտանիքի միակ եկամտի աղբյուրն իր կալանավորված պաշտպանյալն է:
Կարդացեք նաև
Նա նաեւ ասաց, որ ակցիաների ընթացքում ոստիկանների եւ ակցիայի մասնակիցների միջեւ տեղի է ունենեցած միջադեպը չի կարող որակվել խուլիգանություն: Փաստաբանի խոսքով՝ ոստիկան Արա Մարտիրոսյանին հրել է ոչ թե Արմեն Հովհաննիսյանը, այլ իր մյուս պաշտպանյալը՝ Տիգրան Պետրոսյանը:
Շանթ Հարությունյանը կրկին ընդհատեց դատական նիստը, դժգոհեց, որ դատական նիստը սկսվում է փաստաբան Արաք Զաքարյանի խոսքով.«Մեր դատը պետք է սկսվի մեզնից, թող ինքը գնա արդարադատության խորհրդում դասախոսություններ կարդա կալանքի խափանման մասին: Առաջինը մեղադրյալներին հարցրեք՝ ունե՞ք ասելու բան, որովհետեւ ես եմ դատվողը: Միտում եմ տեսնում»:
Արփինե ՍԻՄՈՆՅԱՆ
