Քիմպրոմցիներն այսօր էլ են ցույց արել ու սպասել նախկին նախարարին:
Այսօր «Վանաձոր-Քիմպրոմ» ՓԲԸ-ի աշխատակիցները կրկին ցույցի էին ելել:
Այս անգամ նրանք Վանաձորում սպասում էին ՀՀ էներգետիկայի եւ բնական պաշարների նախկին նախարար, այսօր արդեն ՀՀ նախագահի խորհրդականի պաշտոնը զբաղեցնող Արմեն Մովսիսյանին:
Նախկին նախարարը, սակայն, հանդիպմանը այդպես էլ չեկավ:
Կարդացեք նաև
Քիմպրոմցիների հետ սպասող ՀՀ Ազգային ժողովի պատգամավոր Էդմոն Մարուքյանն Aravot.am-ի հետ զրույցում տեղեկացրեց, որ իր միջնորդությամբ պայմանավորվածություն է ձեռք բերվել հանդիպումը տեղափոխել եկող երեքշաբթի. «Պայմանավորվածություն է ձեռք բերվել: Տեղում զանգեցինք նախկին նախարար Արմեն Մովսիսյանին, ով խոստացավ մյուս շաբաթ այցելել»:
Քիմպրոմցիները պնդում են, որ իրենք այլեւս ամեն բանի պատրաստ են, գնալու են անհնազանդությունների, չեն աշխատելու, մի մասն էլ գումար չունի`անգամ ցույցի գնալու. «Այս մարդիկ պնդում են, որ Արմեն Մովսիսյանն է սեփականատերը ու պահանջում են, որ սեփականատերը հանդիպի իրենց հետ: Թե որքանո՞վ է այդ տեղեկությունն իրականությանը համապատասխանում, չեմ կարող ասել»,-նշում է Էդմոն Մարուքյանը:
Նա նկատում է, որ քիմպրոմցիների հարցը բազմիցս բարձրացրել է խորհրդարանում:
«Ես այս հարցը մի քանի անգամ խորհրդարանում բարձրացրել եմ, կառավարության պատասխանը հետեւյալն է` մասնավոր ընկերության հետ կապված, ըստ էության, որեւէ բան չեն պատրաստվում անել, ու ասում են, որ թող օրենքով սահմանված կարգով շարժվեն: Դա նշանակում է` դիմել դատարան: Իսկ մենք գիտենք, որ ընկերության դեմ արդեն հայցեր կան հարուցված, այսինքն` սնանկության վարույթ կա սկսված, եթե գնա սնանկացման, չգիտեմ` այդ մարդկանց փողը կտա՞ն, չեն տա: Մի խոսքով` գիգանտ գործարանը կործանման եզրին է»,-եզրափակում է Էդմոն Մարուքյանը:
Անուշ ԲՈՒԼՂԱԴԱՐՅԱՆ
Լուսանկարը` Էդգար Մարուքյանի:
