Ինչպես արդեն տեղեկացրել ենք, այսօր` հունիսի 2-ին, ԵԱՀԿ 23-րդ Խորհրդարանական վեհաժողովի (ԽՎ) ամփոփիչ նիստում քննարկվելու էր Բաքվի հռչակագիրը: Այն ընդունվեց ձայների 99 «կողմ», մեկ «դեմ» եւ 9 «ձեռնպահ» հարաբերակցությամբ: ԵԱՀԿ ինը պատվիրակներ, ներառյալ ԵԱՀԿ-ում Ռուսաստանի պատվիրակության անդամները «ձեռնպահ» քվեարկեցին Բաքվի հռչակագրին:
Հիշեցնենք, որ Հռչակագրին է կցված նաև ԱՄՆ սենատոր Բենյամին Քարդինի կողմից առաջարկած Ուկրաինայի նկատմամբ «Ռուսաստանի Դաշնության կողմից Հելսինկիի սկզբունքների ակնհայտ, կոշտ եւ չուղղված խախտումների մասին» հակառուսական բանաձեւը:
Հռչակագրում մասնավորապես ընդգծված է հակամարտությունները խաղաղ ճանապարհով եւ բանակցությունների միջոցով կարգավորելու անհրաժեշտությունը, սահմանների անխախտելիության եւ տարածքային ամբողջականության, ազգերի ինքնորոշման ու իրավահավասարության սկզբունքների պահպանման կարեւորությունը, որոնք ամրագրված են Հելսինկյան ակտում:
Հռչակագրով նաեւ կոչ է արվում Ռուսաստանին չեղյալ համարել Ղրիմի եւ Սևաստոպոլի բռնակցումը, իսկ ԵԱՀԿ անդամ երկրներին կոչ է արվում հրաժարվել Ղրիմը ՌԴ սուբյեկտ ճանաչելուց:
Կարդացեք նաև
Բաքվի հռչակագրում մտահոգություն է հայտնվում Ադրբեջանում, Բելառուսում, Ղազախստանում, Ռուսաստանում վարչական ընթացակարգերի չարաշահման, օրենսդրական խախտումների, մարդու իրավունքների պաշտպանությամբ զբաղվող փորձագետներին և քննադատներին ահաբեկելու, կալանավորելու, նրանց այդ կերպ լռեցնելու դեպքերի վերաբերյալ:
Տաթև ՀԱՐՈՒԹՅՈՒՆՅԱՆ
