«Եթե իշխանության հայեցողության սահմանները հստակեցված չեն, իշխանության գլուխ կանգնած մարդիկ ինչ ուզեն, ինչպես ուզեն, կանեն և հաճախ ինչ ուզում և ինչպես ուզում անում են: Վերին էշելոններում մարդիկ զգաստ են, բայց միջին օղակներում բորենիների համաստեղծություն է տիրում»,-այսօր Արմավիրի մարզի Արմավիր քաղաքում հայտարարեց Սահմանադրական դատարանի (ՍԴ) նախագահ Գագիկ Հարությունյանը:
Նշենք, որ շարունակվում է ՀՀ սահմանադրական բարեփոխումների հայեցակարգին նվիրված հանրային քննարկումների մարզային փուլը: Քննարկումներ են տեղի ունեցել Աշտարակ և Արտաշատ քաղաքներում:
Պարոն Հարությունյանը շեշտեց Սահմանադրական բարեփոխումների անհրաժեշտությունը և անդրադառնալով քննադատություններին՝ նշեց. «Հաճախ շատերը դատողություններ են անում սահմանադրական բարեփոխումների մասին, անգամ երբեմն դրանք հասնում են պոպուլիզմի: Նմաններին պատասխանելը իմաստազուրկ է: Եթե սթափ չգնահատենք իրավիճակը և հետևություններ չանենք, ապա հետո ուշ է լինելու»:
Գագիկ Հարությունյանը նկատում է, որ իրավիճակի թելադրանքով հաճախ մարդը հայտնվում է Սահմանադրության լուսանցքում, տարիներ առաջ իրականացված սահմանադրական բարեփոխումները գնացին իշխանակենտրոն սահմանադրության ձևավորման ճանապարհով, այնինչ նպատակը պետք է լինի սահմանադրությունը դարձնել մարդակենտրոն:
Կարդացեք նաև
Պարոն Հարությունյանը մանրամասնեց. «Ես ուզում եմ, որ իմ երեխաները ապրեն մի երկրում, որտեղ չինովնիկը նրանց ճակատագիրը չի որոշում, որտեղ կա Սահմանադրություն, որը սահման է դնում իշխանության և տալիս նաև ազատության սահմանների հստակություն: Հակառակ դեպքում պետք է ապավինենք իշխողների բարյացակամությանը»:
Կրկնելով այն միտքը, թե «միայն ազնիվ խոսքով պետություն չես դառնա», ՍԴ նախագահը քննադատության սուրն ուղղեց դեպի դատական, գործադիր և օրենսդիր իշխանություն: Դատարանների աշխատանքն ու նրանց կայացրած որոշումները պարոն Հարությունյանը բնութագրեց «պարզապես մարդուն մերժելու ու մարդու իրավունքները ոտնահարելու մի ամբողջ շղթա»:
Այնուհետև տեղեկացրեց, թե իրենց դիմած քաղաքացիների վաթսուն տոկոսի դիմումները վերաբերում են օրենքի բացերին: Գագիկ Հարությունյանը խոստովանեց. «Սահմանադրության մեջ տասնյակից ավելի նորմեր կան, որոնք չենք օգտագործվում կյանքում»:
Հետո պարոն Հարությունյանը օրինակ բերեց այդ նորմերից այն, որ պատգամավորները չեն կարող զբաղվել ձեռնարկատիրական գործունեությամբ: Սակայն միևնույն ժամանակ նկատեց, թե «ՀՀ նախագահի մոտ գործարարների հետ հրավիրված ցանկացած խորհրդակցության ժամանակ դահլիճի կեսը պատգամավորներ են»:
Գագիկ Հարությունյանի համար մտահոգիչ է նաև այն փաստը, որ դատական, օրենսդիր և գործադիր մարմիններում բարձր պաշտոններ զբաղեցնող անձանց եկամուտի առյուծի բաժինը ոչ թե աշխատավարձից է, այլ բիզնեսից: Որպես օրինակ՝ ՍԴ նախագահը նշեց. «Դատական համակարգում դա կազմում է հիսուն տոկոս, գործադիրում՝ երեսուն, օրենսդիրում՝ երեքից հինգ տոկոս»:
Ամփոփելով Գագիկ Հարությունյանը հայտարարեց. «Մարդու տեսած լավ կամ վատ երազից, զոքանչի հետ հարաբերություններից չպետք է կախված լինի պետական կառավարումը: Պիտի ստեղծվի պետական հզոր համակարգ. սա է այս ամբողջ բարեփոխումների գաղափարախոսությունը»:
Տաթև ՀԱՐՈՒԹՅՈՒՆՅԱՆ
Պարոն Հարությունյանը երևի որոշել է թողնել իր պաշտոնը կամ տեղափոխվել արտերկիր:
Տիպիկ կոմունիստական դեմագոգիա: Խոսում է շարքային քաղաքացու նման,մեզ`չգիտես ինչի տեղ դնելով:Այս մարդն այդպես էլ իր հին պատյանից դուրս չեկավ:Բանից պարզվում է,որ վերևներում հրեշտակներ են հավաքված:Պ-ն Գ.Հարությունյան,իսկ երբ նախագահդ ասում էր ,,գլխից է պետք բռնել,, տեսնես ում??նկատի ուներ–միջին օղակներին??:
Առաջարկ՛ մեր Վերին էշելոնների պաշտոնյաներին, որոնք կանոնավոր նալոգ են ստանում բորենիներից: Հաճախեք’ թաթերական խմբակներ, թէ չէ շատ անբնական եք խաղում: Ես չեմ հասկանում , այս տիպի պաշտոնյաները հաճույք են ստանում, երբ ամբողջ ժողովուրդը ծիծաղում է իրենց ասածի ու պահվածքի վրա:
Ճիշտ է գրագետ ժուլիկն ավելի դիվանագիտական պահմտոցի գիտի քան անգրագետ ժուլիկը, բայց երկու ճանապարհ ով պիտի անցնեք: 1.Բարոյական կործանում
2. ֆիզիկական կործանում և ոչնչացում:3-րդ ճանապարհ չունեք: