Ստացա ծանուցում, թե իբր խախտել եմ ավտոտրանսպորտային միջոցի կայանման կանոնները։ Այլ կերպ ասած, մեքենան կանգնեցրել եմ կարմիր գծերի մեջ եւ սահմանված ժամկետում չեմ կատարել վճարումը։ Ըստ այդմ, կազմվել է արձանագրություն եւ ներկայացվել է տուգանք հինգ հազար դրամի չափով։
Երբ ստացա ծանուցումը, մտածեցի, որ գուցե թե ինչ-որ տեղ կանգնեցրել եմ մեքենան եւ չեմ նկատել կարմիր գծերը։ Բայց երբ բացեցի ծրարը եւ դիտեցի «խախտման» վայրի լուսանկարը, ապշեցի։ Այնտեղ, որտեղ կանգնած է մեքենան, եւ որի համար տուգանք է նշանակվել, երբեւէ չի եղել կարմիր գիծ եւ չկա։ Ի՞նչ հիմքով էր խախտում արձանագրվել, անհասկանալի մնաց։
Այս դեպքն անշուշտ կարելի էր պարզապես թյուրիմացություն համարել, եթե եզակի լիներ։ Այնինչ նման ծանուցումներ են ստացել նույն տարածքում կայանած նաեւ այլ տրանսպորտային միջոցների վարորդներ։
Այնպիսի տպավորություն է, որ դա հատուկ է արվում։ Կվճարեն՝ կվճարեն, չէ՝ ոչինչ։ Իսկ թե ով պետք է պատասխան տա քաղաքացիներին պատճառվող անհարմարությունների համար, հայտնի չէ։
Կարդացեք նաև
Եվ այսքանից հետո վճարովի ավտոկայանատեղի ծառայություն մատուցող ընկերությունը զարմանում է, որ մարդիկ դժգոհում են իրենց գործունեությունից։ Չհաշված այն անհարմարությունները, որ առաջացել են կարմիր գծերի հայտնվելուց հետո։
Վասակ ԹԱՐՓՈՇՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
