Այսօր Բաղրամյան 26-ի դիմաց ՀՀ նախագահ Սերժ Սարգսյանի հրաժարականի պահանջով ԱԻՄ-ականներն այդպես էլ չհավաքվեցին:
Թեեւ ավելի վաղ հայտարարել էին, որ նախագահի հրաժարականի պահանջով հավաքվելու ու բողոքի ակցիա են անցկացնելու: Բայց իրենց նախատեսած ակցիան հետաձգել են` ՀՀ նախագահի ` Հայաստանից բացակայության պատճառով:
ԱԻՄ-ականներից Բաղրամյան 26 էր եկել միայն ԱԻՄ առաջնորդ Պարույր Հայրիկյանի ազգականը` Վրեժ Զատիկյանը ու նախագահի հրաժարականի պահանջով իրենց 2-րդ նամակը հանձնեց: Հիշեցնենք, որ նախորդ ամիս ԱԻՄ-ականները նույն պահանջով նախագահին նամակ էին ուղարկել:
«Այս անգամ հարկ գտանք երկրորդ նամակը ուղարկել, քանի որ առաջին նամակը մնաց անպատասխան: Սա անկրթություն, անշնորհքություն էր նախագահի եւ իր վարչակազմի կողմից: Քանի որ իրենց դիմողը եղել է ամենահին կուսակցությունը, եւ հանրապետականներն էլ ԱԻՄ-ից են ծնվել: Լինելով նրանց նախահայրը` իրենց բարեկամական նամակ ենք գրել, որ դուք Հայաստանը կործանում եք, մարդ եղեք եւ հրաժարական տվեք ամբողջ վարչախմբով:
Կարդացեք նաև
Եվ մեր բարեկամական նամակի պատասխանը չստանալով` այս անգամ գրեցինք, որ իրավունք չունեք մեզ չպատասխանելու, քանի որ Հայաստանը կործանում եք, եւ Հայաստանը միայն ձերը չէ, պատկանում է բոլոր հայերին»,- Aravot.am-ին ասաց Վրեժ Զատիկյանը:
Մանրամասները` տեսանյութում
Արփինե ՍԻՄՈՆՅԱՆ
