«Այս նախագիծը ուրբաթ օրը բնապահպանական եւ գյուղատնտեսական հարցերի մշտական հանձնաժողովի նիստում քննարկվել է, բնապահպանության նախարարության ներկայացուցիչչն ասաց, որ այս նախագիծը քննարկվել է նաեւ ՀԿ-ների հետ: Ընդմիջմանը ՀԿ ներկայացուցիչները մոտեցան եւ ասացին, որ այն չի քննարկվել ՀԿ-ների հետ, ասացին, որ այս նախագիծը մի շարք վտանգավոր դրույթներ է պարունակում: Այս նախագծով ավելի է վատթարանալու վիճակը, եւ հանրությունը հնարավորություն չի ունենալու գնահատել, թե ինչպես է փոխվելու միջավայրը, օրինակ, շինարարության դեպքում»,– այսօր ԱԺ-ում «Շրջակա միջավայրի վրա ազդեցության գնահատման եւ փորձաքննության մասին ՀՀ օրենքում փոփոխություններ եւ լրացումներ կատարելու մասին օրինագծի քննարկման ժամանակ ասաց «Ժառանգության» պատգամավոր Զարուհի Փոստանջյանը:
Նրա խոսքերով՝ «Կառավարությունը պետք է լինի անկեղծ եւ ասի, որ այս նախագիծը քննարկման առարկա չի դարձել: Պետք է ԱԺ-ում տեղի ունենային լսումներ, որպեսզի մասնագետներն իրենց կարծիքը արտահայտեին, որ իրենց կարծիքի հիման վրա էլ մենք կազմեինք մեր կարծիքը: Կխնդրեի, որ մյուս անգամ ավելի անկեղծ լիենք եւ չստեք: Ինձ ասացին, որ դուք ստել եք, այս նախագիծը չի քննարկվել: Հանձնաժողովի քննարկմանը դուք այլ նախագիծ եք բերել, քննարկել եք մի ուրիշ նախագիծ»:
ԱԺ փոխխոսնակ Հերմինե Նաղդալյանը Զարուհի Փոստանջյանի ելույթից հետո կոչ արեց հարգալից լինել միմյանց նկատմամբ ԱԺ դահլիճում:
Հռիփսիմե ՋԵԲԵՋՅԱՆ
Կարդացեք նաև
