Գերմանական «Tageszeitung» օրաթերթի արտաքին կապերի գլխավոր խմբագիր Բարբարա Օերթելն աշխատանքային այցով գտնվում է Երևանում: Դեկտեմբերի 8-12-ը Երևանի պետական համալսարանում ընթացող «Հայ-գերմանական ժուռնալիստական դպրոց» նախագծի շրջանակներում վերջինս անդրադարձել է գերմանական լրատվամիջոցներում միջազգային կոնֆլիկտների լուսաբանմանը:
Հայաստանի տարածքային խնդիրներին քաջատեղյակ գերմանացի լրագրողը դեկտեմբերի 11-ին ներկա էր Հայոց Ցեղասպանության կազմակերպիչներից Ջեմալ փաշայի թոռան` թուրք գրող Հասան Ջեմալի հետ հանդիպմանը, որի ժամանակ ներկայացվեց վերջինիս «1915. Հայոց Ցեղասպանություն» գիրքը:
Արդյոք տեղ կգտնի՞ այս պատմական իրադարձությունը գրեթե 60 000 օրինակով հրատարակվող օրաթերթում, տիկին Օերթելը պատասխանեց. «Ամբողջ ընթացքում ես գրառումներ էի անում: Սակայն հարցն այն է, որ մենք շատ քիչ բան իմացանք գրքի բովանդակության մասին»:
Կարդացեք նաև
Բանախոսը բողոքեց անգլերեն թարգմանության հետ կապված տեխնիկական թերություններից, ինչի պատճառով տեքստն այնքան էլ հասանելի չի եղել իր համար: Նա որպես անքաղաքավարություն դիտարկեց հանդիպման ավարտին հաջորդիվ ֆիլմի ցուցադրության պատճառով հանդիսատեսին դահլիճից վտարելը՝ այն դեպքում, երբ բոլորն անհամբեր սպասում էին իրենց հարցերը հեղինակին ուղղելուն: «Կցանկանայի լսել հայ ժողովրդին, հասկանալ նրա մտահոգությունը: Սակայն դա այդպես էլ տեղի չունեցավ», – նշեց մեր զրուցակիցը՝ հավելելով, որ չի պատրաստվում լուսաբանել այս թեման, քանի որ հստակ պատկերացում չունի, թե ինչ է մտածում Հասան Ջեմալը հայ-թուրքական հակամարտության կարգավորման շուրջ:
Տեղեկացնենք, որ հանդիպման ընթացքում, ապա նախասրահում հանդիսատեսը դժգոհություն հայտնեց թուրք հեղինակի ելույթի վերաբերյալ, որում վերջինս Ջեմալ փաշայի հետ հաշվեհարդար տեսած հայերի խմբին որակեց որպես «ավազակախումբ»:
«Կե՞ ղծ էր այս ամենը, թե՞ ոչ՝ չեմ կարող ասել, սակայն Թուրքիայի անզիջողականության պայմաններում Ցեղասպանությունից խոսելը արդեն մեծ քայլ է»,- ամփոփեց մեր արտերկրացի հյուրը:
Անի ԱՆՏՈՆՅԱՆ
