Քաղաքագետ Գեղամ Նազարյանը անհասկանալի հանելուկներ է տեսնում գլխավոր դատախազ Գեւորգ Կոստանյանի պնդումներում՝ Գյումրիում նախորդ օրը տեղի ունեցած սպանության գործի քննության վերաբերյալ:
«Կոստանյանը բառախաղ էր անում, որը նպատակ ունի այդ հայտարարությամբ հանդարտեցնելու գյումրեցիներին, նշանակում է, որ ուզում են այնպես կազմակերպել, որ դատավարությունը տեղի ունենա Հայաստանում, բայց իրականացնի ռուսական կողմը: Հիմա էլ փորձում են ձեւակերպել թե հանցագործը հոգեկան խնդիրներ ունի, այդ ամենը հայ ժողովրդին չի հետաքրքրում, մեր արժանապատվությունը պահանջում է, որ Հայաստանի շահը նորից ոտնատակ չտրվի»,- այսօր «Պոստ սկրիպտում» ակումբում ասաց քաղաքագետը:
Նրա խոսքով, հանցագործները պետք է խստագույնս պատժվեն, հակառակ դեպքում հինգ տարի հետո չի բացառվում, որ ռուսական ռազմաբազայի մեկ այլ զինծառայողի կդրդեն դուրս գալ եւ պատվերով հանցագործություն կատարել. «Վտանգավոր նախադեպ է ստեղծվում»:
Մեր հարցին, այսինքն` կասկածներ ունեք, որ սպանություն կատարելու մեջ մեղադրվող ռուս զինծառայող Վալերի Պերմյակովը պատվե՞ր է կատարել, ասաց. «Որպես շարքային քաղաքացի կարող եմ ենթադրել, որ միայնակ է եղել կամ ոչ միայնակ: Բայց այն ամենն ինչ մատուցում են, խիստ հակասական է, հարց է առաջանում՝ ինչու 18-19 տարեկան երիտասարդը վեց հոգանոց ընտանիքին պետք է սպաներ, ենթադրենք վախից կրակել է, վախից կրակողը մեկի վրա կրակում է ու փախչում, ոչ թե դանակը վերցրած՝ վեց ամսական երեխայի հետեւից է ընկնում»:
Կարդացեք նաև
Արփինե ՍԻՄՈՆՅԱՆ
