«Այսօր պետք է վերցնեմ դատաբժշկի եզրակացությունը, հետո գնամ բողոք ներկայացնեմ, ինձ այսպես են ասել ոստիկանությունում»,-Aravot.am-ի հարցին` արդյոք իրեն ծեծի ենթարկելու փաստի առնչությամբ գործ հարուցվե՞լ է, այսպես պատասխանեց սոցիալական ցանցերում որպես «Նավակ ճոճողը» ներկայացող քաղաքացիական ակտիվիստ Վիլեն Գաբրիելյանը:
Նշենք, որ ՀՀ ոստիկանությունը դեռ հետաքննություն է իրականացնում: Վիլեն Գաբրիելյանն ասաց, որ սպասում է քննիչի զանգին, հավանաբար այսօր կամ վաղը բողոք կներկայացնի ոստիկանություն, որի հիման վրա ոստիկանությունը գործ կհարուցի:
Ինչպես արդեն տեղեկացրել ենք, երկու օր առաջ Երևանում ` Չարենցի դպրոցի մոտ դիմակավորված անձինք Վիլեն Գաբրիելյանին ծեծի էին ենթարկել:
Այնուհետև Վիլեն Գաբրիելյանը հայտարարեց, թե այս ամենի պատվիրատուն ՀՀ ոստիկանապետ Վովա Գասպարյանն ու ոստիկանապետի տեղակալ Լևոն Երանոսյանն են, որը կատարել են Ֆեյսբուքում իրենց մասին իր հնչեցրած քննադատության պատճառով: Նա նաև տեղեկացրել էր, որ Արթուր Կիրակոսյան անունով մի օգտատեր իր հասցեին հայհոյանքներ է հնչեցրել և սպառնալիքներ տեղացել ու գրել. «Հերիք ա քեզ լպիրշ պահես այ սուտի «անաչառ» … Նոռմալ նստի տեղդ, թե չէ մի օր ստորին վերջույթներդ կպոկեմ…»:
Կարդացեք նաև
Երեկ Վիլեն Գաբրիելյանի հնչեցրած մեղադրանքներին, թե ծեծի պատվիրատուն Վովա Գասպարյանն է, ՀՀ ոստիկանապետը այսպես էր պատասխանել. « Պատկերացնո՞ւմ եք՝ ինչ կլիներ իրականում ակտիվիստի հետ, եթե ոստիկանապետը որոշեր վրեժխնդիր լինել նրանից»:
Մեր հարցին` սա ոստիկանապետին վայե՞լ պատասխան էր, Վիլեն Գաբրիելյանն արձագանքեց. «Այստեղ վայելի խնդիր չէ, այլ հնարավորությունների: Իմ պատկերացրած նորմալ օրինական երկրներում այդ հնարավորությունը պիտի լիներ օրենքի սահմաններում, բայց ոստիկանապետը հրապարակային հայտարարում է, որ ինքը այլ հնարավորություններ էլ ունի՝ բացի օրինականից»:
Մեր այն հստակեցմանը` շարունակու՞մ է պնդել, թե պատվիրատուն Վովա Գասպարյանն ու Լևոն Երանոսյանն են և արդյոք հույս ունի՞, որ գործը բացահայտվելու է, Վիլեն Գաբրիելյանը պատասխանեց. «Հույս չունեմ, որ գործը բացահայտվելու է, քանի որ պատվիրատուն ոստիկանապետն է: Ոստիկանապետն ինքն առաջին հերթին պիտի ձեռնամուխ լինի բացահայտել գործը, թող գործը բացահայտի, որ ինքը ոչ մի կապ չունի, որևէ խնդիր չկա, ավելի ուրախ կլինեմ»: Հարցին` արդյոք այս միջադեպը կանդրադառնա՞ իր հետագա գործունեության վրա, մասնավորապես՝ Ֆեյսբուքում, Վիլենը պատասխանեց. «Ոնց արել ենք, այդպես էլ շարունակելու ենք, դեռ մի բան էլ ավելի»:
Տաթև ՀԱՐՈՒԹՅՈՒՆՅԱՆ
Լուսանկարը՝ Վիլեն Գաբրիելյանի ֆեյսբուքյան էջից
