Երեկ «Նաիրիտի» քացախաթթվի արտադրամասի գույքի գնորդներ են գործարան գնացել:
«Հունվարի 22-ին, ինչպես խոստացվել էր գույքի օտարման հանձնաժողովը ստեղծվեց, երեկ էլ գնորդները գնացել են գործարան, նայել են, այս պահին այդ բանակցություններն արդեն վարում են: Կարծես թե նախնական համաձայնությունը` այո ես պատրաստ եմ գնելու, կա: Մնում է գույքը գրավից հանելու խնդիրը, ենթադրում եմ, որ նախարարը գոնե իր այդ խոստումը կկատարի»,- Aravot.am-ին ասաց «Նաիրիտի» աշխատակից Անուշ Հարությունյանը:
Հիշեցնենք, որ նախարար Երվանդ Զախարյանը նաիրիտցիներին հորդորել էր սպասել, մինչեւ քացախաթթվի արտադրամասի գույքը վաճառեն ու աշխատավարձ տան:
Կարդացեք նաև
Այսօր նաիրիտցիները կրկին նախագահական նստավայրի դիմաց էին հավաքվել` աշխատավարձերի վճարման պահանջով
Անուշ Հարությունյանը մտավախություն ունի, որ իրենց չհավաքվելու պարագայում այդ գույքի վաճառքն էլ կարող է չկազմակերպվեր: Նրա խոսքով, նաիրիտցիները այս պահին, բացի բողոքի ակցիաներից այլ պայքարի միջոց չունեն. «Այլ բան առաջարկել մարդուն` գնա տանը նստի ու սպասի, մարդիկ 4 տարի նստել ու սպասել են: Այսօր ու սրանից առաջ եկել ենք այդ պահանջով` որոշակի գումար պարտքից պետք է վճարվի»:
Նրա կարծիքով, գույքի վաճառքից ամբողջ պարտքի 1/3-ը կվճարվի. «Պարտքը կազմում է 13-15 միլիոն դոլար, իսկ գույքը գնահատված է 5-7 միլիոն դոլար, մոտ վեց ամսվա փող»:
Գործարանի աշխատակիցներից մեկն էլ ասաց այնքան են նախագահական նստավայր գալու գնալու, մինչեւ կոշիկները մաշվեն:
Մանրամասները` տեսանյութում
Արփինե ՍԻՄՈՆՅԱՆ
