Ըստ Սամվել Զաքարյանի` նախարարությունը պնդում էր, որ դրոշմապիտակավորման արդյունքում ամեն մի դեղ կթանկանա 3-ից 5 դրամով, սակայն դրանք թանկացել են մինչեւ 5 տոկոս
Եվրասիական Տնտեսական Միության շուկա մտնելու հետ կապված Հայաստանի դեղերի շուկայում փոփոխություններ են սպասվում: Այս մասին այսօր «Բլից Ինֆո» մամուլի ակումբում հայտնեց դեղարտադրողների եւ ներմուծողների միության նախագահ Սամվել Զաքարյանը:
«Ամբողջ տարին մենք բավականին լուրջ զբաղված ենք լինելու Բելառուսի, Ռուսաստանի եւ Ղազախստանի հետ` փորձելով հարմոնիզացնել դեղագործական շուկան: Դեղագործության կարգավորումը հետաձգվել է մինչեւ 2016 թվականի հունվարի մեկը»,- նշեց Սամվել Զաքարյանը:
Ըստ բանախոսի` Հայաստանի դեղագործական շուկան շատ ավելի լավ է կարգավորված, քան ԵՏՄ այլ երկրներինը. «Հայաստանում մի քանի կազմակերպություններ ունեն եվրոպական GNP հավաստագրեր, որոնք հնարավորություն են տալիս դեղեր արտահանել Եվրոպա: Մինչդեռ ԵՏՄ երեք երկրներում դրանք չկան: Սակայն այս մեկ տարվա ընթացքում պատրաստվում են ստեղծել նման հավաստագրեր»:
Կարդացեք նաև
Սամվել Զաքարյանի խոսքով` ԵՏՄ երկրների հետ հարմոնիզացիայի քայլերից մեկն էլ դեղերի գրանցման հետ է կապված:
Սամվել Զաքարյանը նշեց, որ արժույթի արժեւորմամբ պայմանավորված` անցյալ տարվա վերջում դեղերի շուկայում եղան 10 -15 տոկոս թանկացումներ, որոնք դեռեւս պահպանվում են` 3-5 տոկոսով. «Քանի որ Հայաստանի դեղերի 90 տոկոսը ներմուծվում են, այդ թանկացումները սպասելի էին»:
Ինչ վերաբերում է դրոշմապիտակավորման պատճառով գրանցված թանկացումներին, Սամվել Զաքարյանը նշեց, որ այն դեղերը, որոնք մինչեւ նոյեմբերի մեկը եղել են դեղատներում արդեն ներմուծված, դրանք չեն թանկացել: Սակայն նոյեմբերի 1-ից հետո ներմուծված դեղերը պարտադիր դրոշմապիտակավորված են. «Դրոշմապիտակավորման արդյունքում, ըստ մեր հաշվարկների, դեղերը թանկացել են 4,5-ից 5 տոկոսով: Նախարարությունը պնդում էր, որ ամեն մի դեղ կթանկանա 3-ից 5 դրամով, սակայն դրանք թանկացել են մինչեւ 5 տոկոս: Քանի որ այս դրոշմապիտակավորման գործողությունը սկսվել էր ստվերային տնտեսության կրճատման նպատակով, ապա մենք պատասխանի ենք սպասում ֆինանսների նախարարությունից,թե ինչ արդյունքներ է գրանցել օրենքի ընդունումը»:
Նշենք, որ հոկտեմբերի 31-ից ուժի մեջ մտած «Առևտրի և ծառայությունների մասին» օրենքի համաձայն դեղերը պետք է պարտադիր դրոշմապիտակավորվեն:
Էլյա ՀՈՎՀԱՆՆԻՍՅԱՆ