Փետրվարի 21-ը Մայրենի լեզվի միջազգային օրն է, որն արդեն տասներորդ տարին է՝ նշվում է նաև Հայաստանում։
ՀՀ ԿԳՆ Լեզվի պետական տեսչության պետի տեղակալ Մարինե Հովյանի խոսքով՝ մայրենիի աղավաղման դեպքերը բազմաթիվ են և առկա են ինչպես հասարակ քաղաքացիների, այնպես էլ լրատվամիջոցների ու պետական պաշտոնյաների խոսքում։
Մ. Հովյանն այսօր լրագրողների հետ հանդիպման ժամանակ վստահեցրեց, որ Տեսչությունն ուսումնասիրում և անհրաժեշտության դեպքում դատարանի միջոցով տուգանք է կիրառում բոլոր այն տնտեսվարողների նկատմամբ, որոնք խախտում են Լեզվի մասին օրենքը։ Տիկին Հովյանը, սակայն, չհիշեց որևէ պետական պաշտոնյայի, որի հանդեպ մինչև այժմ նման տուգանք է կիրառվել:
Նրա փոխանցմամբ՝ վերջին տարիներին Լեզվի պետական տեսչության գործառույթները նվազեցվել են, և այժմ այն միայն վերահսկողական գործառույթ է իրականացնում. «Ժամանակին Տեսչությունն ստեղծվել է որպես լեզվական միասնական քաղաքականություն մշակող և իրականացնող մարմին, սակայն այսօր այն զրկվել է լեզվական քաղաքականություն իրականացնելու հնարավորությունից: Հայտնվելով ԿԳՆ կազմում՝ Տեսչությունը հանդես է գալիս որպես վերահսկողական գործառույթներ կատարող մարմին»,- նշեց ՀՀ ԿԳՆ լեզվի պետական տեսչության պետի տեղակալը:
Նրա համոզմամբ՝ Լեզվի մասին օրենքում օրենսդրական փոփոխություններ իրականացնելու անհրաժեշտություն կա։
«Օրենսդրական փոփոխությունների նախագիծը մեկ տարի առաջ ներկայացվել է կառավարություն, սակայն մինչ օրս այն մնում է անտեսված: Լեզվի պետական տեսչության ստուգաթերթերն անգամ կառավարության կողմից մինչև այսօր չեն հաստատվել: Արդյունքում՝ Տեսչությունը կարողանում է միայն վարչական վարույթներ կազմել, իսկ ստուգումներ իրականացնել չի կարող»,- ասաց Մ. Հովյանը:
Նրա տեղեկացմամբ՝ նախորդ տարվա ընթացքում Տեսչությունը դատարան է ուղարկել 42 գործ, որի արդյունքում մոտ 3.5 մլն դրամ է մուտքագրվել բյուջե։ Բանախոսի փոխանցմամբ՝ լեզվական աղավաղումների համար տուգանքի նվազագույն չափը 250 հազար, իսկ առավելագույնը՝ 600 հազար դրամն է։
Սիրանուշ ՀԱՅՐԱՊԵՏՅԱՆ
Առաջին տուգանվողը պետք է լինի Գալուստ Ստահակյանը, ով ամեն օր, ամեն ժամ վարկաբեկում է մայրենին և նույնիսկ ծաղրուծանակի ենթարկում սրբություն սրբոցը, և այդ ամենի համար պետականորեն խրախուսվում բարձր պաշտոնով և աշխատավարձով…
Այսինքն մայրենիի գլխավոր աղավաղողը պետությունն է, որը պաշտոններ շնորհելուց և վաճառելուց առաջ գոնե պիտի ստուգի մայրենիի իմացության աստիճաը`մրցութային եղանակով (գրավոր և բանավոր)…