Գյումրեցի Ավետիսյանների ընտանիքի սպանության գործով նշանակված դատաձգաբանական փորձաքննության արդյունքները դեռեւս չեն ստացվել, քանի որ փորձաքննության եզրակացությունը դեռեւս պատրաստ չէ։
Այդ մասին ասաց Ավետիսյանների իրավահաջորդների ներկայացուցիչ Երեմ Սարգսյանը։
Դատաձգաբանական փորձաքննությունը առանցքային դեր ունի գործում, քանի որ հստակ պարզ կդառնա՝ միայնա՞կ է գործել մարդասպանը, թե ոչ։ Եթե պարզվի, որ Ավետիսյանների ընտանիքի բոլոր անդամները սպանվել են նույն զենքից, Պերմյակովի՝ միայնակ գործելու վարկածը կուժեղանա։ Իսկ եթե դատաձգաբանական փորձաքննությունը պարզի, որ սպանվածներից որեւէ մեկի վրա կրակել են այլ զենքից, ակնհայտ կդառնա, որ Պերմյակովը միայնակ չի գործել։
Ե. Սարգսյանը, խոսելով փորձաքննության մասին, հայտարարեց, որ դատաձգաբանական փորձաքննության հիմնական փուլն ավարտվել է, սակայն այն վարույթն իրականացնող մարմնի տրամադրության տակ չէ, այլ գտնվում է փորձագիտական կենտրոնում. «Դեռ եզրակացությունը չենք ստացել, բայց կարծես թե այն ավարտական փուլում է, մենք որոշակի առումով մասնակցել ենք այդ աշխատանքներին։ Կարծում եմ՝ առաջիկա 10 օրերի ընթացքում եզրակացություններ կլինեն»,- ասաց Սարգսյանը։
Կարդացեք նաև
Նրանից հետաքրքրվեցինք՝ իր տպավորությամբ, Պերմյակովը մենա՞կ է եղել, թե ոչ, ինչին ի պատասխան՝ փաստաբանը ասաց, որ «որոշակի տվյալների ծանոթ են, բայց դրա վերաբերյալ որեւէ բան այս պահին չեն կարող հրապարակել»:
Մկրտիչ ԿԱՐԱՊԵՏՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում