Այսօր ԱԺ-ում շարունակվում է Տնտեսական մրցակցության պաշտպանության հանձնաժողովի 2015-ի գործունեության ծրագրի քննարկումը:
Տնտեսական հարցերի հանձնաժողովի նախագահ Վարդան Այվազյանի ելույթից հետո ամբիոնին բարկացած մոտեցավ ՀԱԿ խմբակցության պատգամավոր Հրանտ Բագրատյանը եւ ասաց. «Կիսատ վերլուծություններով փորձում եք ՀՀԿ ճշմարտությունը պահել»:
ԱԺ նախագահ Գալուստ Սահակյանը հորդորեց «Մենամարտը՝ դրսում»: Հրանտ Բագրատյանն էլ պատասխանեց. «Մենամարտ չկա, կա միակողմանի ճշմարտություն: Չե՞ք տեսնում, երկիր չի լինում»:
Նա խոսեց պառլամենտարիզմից եւ ժողովրդավարությունից եւ ասաց, որ Գալուստ Սահակյանին ԱԺ նախագահ ընտրելիս կողմ է եղել, բայց ծրագրային դրույթով նա հանդես չի եկել: Հետո դժգոհեց Գալուստ Սահակյանի, ԱԺ փոխխոսնակների աթոռների եւ սովորական պատգամավորների աթոռների տարբերություններից: Հայտնի է, որ ԱԺ նախագահի, Շարմազանովի եւ Հերմինե Նաղդալյանի աթոռներն ավելի լայն թիկունքով են, բարձր, ավելի թանկարժեք: Բագրատյանի խոսքերով՝ «Դեմոկրատիայի նշան է, բոլորի աթոռները պիտի նույնը լինեն: Մենք բոլորս նույնն ենք, հասկանո՞ւմ եք: Ոչ մեկդ չեք ուզում քննարկենք հարցերը, ինքներդ էլ չեք հասկանում, ճիշտ քայլեր չեք անում: Երեկ բաժանել եք Սահմանադրական փոփոխությունները, ասում եք՝ պառլամենտարիզմ: Պառլամենտարիզմը չի նշանակում, որ նախագահի պաշտոնին պիտի կպնեն կամ չկպնեն: Պառլամենտարիզմն այն է, որ բոլոր օրենսդրական ակտերը պիտի ընդունվեն օրենսդրությամբ»:
Կարդացեք նաև
Նա ասաց, որ Հայաստանը կարող է մրցակցել Ադրբեջանի, Վրաստանի հետ. «Դուք չեք ուզում սարքել այս պետությունը»:
Հռիփսիմե ՋԵԲԵՋՅԱՆ
