«Հարցն այնքան լուրջ է, որ հասել է քաղաքական մակարդակի, երկրների մեջ դատական պրոցեսներ են գնում: ԵՄ-ն, որը դեմ է գենետիկորեն վերափոխված օրգանիզմներով սննդին, փորձել է փակել իր սահմանները եւ արգելել ձեւափոխված օրգանիզմների, բույսերի, դրանց սերմերի ներկրումը եվրոպական երկրներ: Իրենց հաջողվեց հորմոն պարունակող սննդի առաջ ճանապարհը փակել, բայց գենետիկորեն ձեւափոխված սննդի առաջ՝ չի հաջողվել»,- այսօր «Հայելի» ակումբում գենետիկորեն ձեւափոխված սննդի վնասակար ազդեցության մասին խոսելիս ասաց Հանուն մարդկային կայուն զարգացման ասոցիացիայի նախագահ Կարինե Դանիելյանը:
Նա ասաց, որ գենետիկորեն ձեւափոխված օրգանիզմների օգտագործումն ունի իր դրական եւ բացասական կողմերը. «Մենք կարող ենք արտադրել այնպիսի բույսեր, որ թույն արտադրեն եւ գյուղատնտեսական վնասատուները չեն կարող գալ եւ բույսը փչացնել: Դա մի կողմից շատ լավ է: Տնտեսապես շատ շահավետ է: Բայց գալիս է ժամանակ, որ տեսնում ենք, որ ռիսկերը չենք հաշվարկել՝ ալերգիաներ են առաջանում եւ այլն: Մարդը ձկան նկատմամբ ալերգիա ունի, լոլիկ է ուտում՝ չիմանալով, որ այնտեղ ձկան օրգանիզմ կա»:
Կարինե Դանիելյանն ասաց, որ արդեն մարդու գենետիկայի վրա ազդեցությունը կա: Հայաստանը գենետիկորեն ձեւափոխված սննդամթերքի սպառող երկիր է: Չունենք էլ լաբորատորիա, որ ուսումնասիրություն անեն, պարզեն դրա պարունակությունը, արգելեն:
Կարդացեք նաև
Հայկական բուսաբանական ընկերության նախագահի տեղակալ Գոհար Օգանեզովան ասաց, որ չգիտենք ինչով կավարտվի այս ամեն ինչը: Անփորձ դաշտի մեջ ենք մենք: Բանն այն է, որ բնական ճանապարհով խաչասերում իրականացնելը վնաս չէ: Ասենք, խնձորը խնձորի հետ խաչասերելը, բայց երբ վերցնում են ձուկը եւ լցնում լոլիկի, խնձորի մեջ՝ դա է վտանգավոր: Վտանգավոր է, երբ հողային մանրէն լցնում են կարտոֆիլի մեջ»:
Բնապահպաններն ասացին, որ Աստված փակել էր այդ տոպրակը՝ խառնաշփոթ չառաջացնելու համար, իսկ հիմա մարդիկ բացում են տոպրակի բերանը ու ոչ ոք չգիտի՝ ինչի կհանգեցնի դա:
«Տապան» էկո-ակումբի նախագահ Հրանտ Սարգսյանն ասաց, որ այդ խնդրով պետք է զբաղվեն իրավաբանական անձինք, որ հասարակությունը կոնկրետ իմանա՝ ով, երբ ինչ ցանեց:
Նա պատմեց, թե ինչ մեծ աշխատանքներ են կատարել՝ օրենքով լուծումներ տալու համար. «Նախկին օրենքում գրված էր ով ուզի՝ կարող է արտադրել, ցանել, շուկա արտահանել գենետիկորեն ձեւափոխված սնունդ: Իսկ նոր օրենքի նախագծում, որն արդեն անցել առաջին լսումները, մի պարբերություն կա, որն ամենակարեւորն է՝ ՀՀ տարածքը զուրկ է գենետիկորեն ձեւափոխված օրգանիզմների օգտագործումից: Ես ենթադրում եմ, որ որեւէ մեկն արդեն չի կարող ներկրել, ցանել, արտադրել նման սննդամթերք: Գյուղատնտեսության նախարարության ներկայացուցիչներն էլ ասացին, որ կա երկու լաբորատորիա, կարող են ստուգել»:
Հրանտ Սարգսյանը պատմեց, թե ինչ է եղել լսումների ժամանակ, ինչպես են որոշ պատգամավորներ ընդդիմացել, երբ իմացել են, որ պետք է գենետիկորեն ձեւափոխված սննդամթերքի առաջ արգելք դրվի: Ընդդիմախոսներից է եղել Տնտեսական հարցերի հանձնաժողովի նախագահ Վարդան Այվազյանը, որը նետել է, թե պատկերացնո՞ւմ եք ինչ է լինելու Գեղարքունիքի մարզում, ասենք՝ ցորեն ցանելիս, մենք ցորեն չե՞նք ցանելու: Բնապահպաններն ապշել են, որովհետեւ դա ասել է բնապահպանության նախկին նախարարը: Կարինե Դանիելյանի խոսքերով՝ «Այսինքն, ինքը բացահայտ ասում է, որ մեր ցանած ցերոնը ԳՄՕ է: Այն տարածքը, որտեղ ԳՄՕ է աճեցվում, բնական սերմերն այլեւս չեն ընդունվում: Սա հետաքրքիր երեւույթ է»:
Հռիփսիմե ՋԵԲԵՋՅԱՆ
