Կառավարության վերջին նիստի ժամանակ որոշվեց եկեղեցական տոներին հաջորդող մեռելոցների օրերը ոչ աշխատանքային լինելու վերաբերյալ 2008 թվականին ընդունված համապատասխան որոշումը վերանայելու նպատակով այն դնել քննարկման: Բացառություն է արվում միայն Սուրբ Զատկի` Հարության տոնին հաջորդող երկուշաբթիի համար, որը կմնա ոչ աշխատանքային:
Այդ որոշման կապակցությամբ զրուցեցինք եկեղեցական հասարակական հարցերի հայեցակարգային հիմնադրույթների գրասենյակի տնօրեն ԲԱԳՐԱՏ եպիսկոպոս ԳԱԼՍՏԱՆՅԱՆԻ հետ:
-Ի՞նչ կարծիքի եք մեռելոցները աշխատանքային օր սահմանելու հնարավոր որոշման մասին:
-Ճիշտն ասած, չգիտեմ, թե դրա նպատակը, միտումը որն է: Դա 2008 թվականից հաստատված կարգ է, եւ, կարծում եմ, ավելի շատ օգուտ է տվել, քան թե վնաս: Ու չեմ կարծում նաեւ, որ մեր ժողովրդի, երկրի կյանքում ամենակարեւոր խնդիրը մեռելոցները պահելը կամ վերացնելն է: Ունենք շատ ավելի հրատապ հարցեր, որոնք ուղղված պետք է լինեն մեր ժողովրդի թե՛ տնտեսական, թե՛ հասարակական կյանքի առողջացմանը: Եթե դրան տնտեսական հիմնավորում են տալիս, ապա չեմ կարող ասել, թե տարվա մեջ ընդամենը հինգ օրը (ընդ որում՝ դրանք փոխարինվում են շաբաթ օրերով) ինչով են խանգարելու տնտեսությանը:
Կարդացեք նաև
-Օրինակ, վարչապետը դա հիմնավորում է այն հանգամանքով, որ մեր երկիրը ԵԱՏՄ անդամ է, ուստի մեր աշխատանքային ռեժիմը պետք է հարմարեցվի այդ միության անդամ երկրների ռեժիմին:
-Աշխարհն այնքան է փոքրացել, որ բոլոր այդ աշխատանքային ռեժիմները, կապերը (մանավանդ մասնավոր գործարարության սկզբունքի վրա են դրանք հիմնականում հիմնված) մարդիկ իրենք կարող են կարգավորել, բարելավել, մշակել իրենց ծրագրերը: Աշխարհում ընդունված գործելաձեւ է, որ մասնավոր գործատերերն իրենք իրենց օրակարգը, աշխատանքային ռեժիմն ու կարգն ունեն եւ, բնականաբար, կարող են հստակորեն համաձայնեցնել մյուսների հետ:
Իմ կարծիքով, պատճառաբանությունն այնքան էլ հիմնավորված չէ: Դե, եթե դա ԵԱՏՄ-ով են պայմանավորում, ապա ուրիշ օրեր էլ կան, որոնք կարող են գործարարներին խանգարել, օրինակ, Ապրիլի 24-ը, Մայիսի 9-ը, Մայիսի 28-ը եւ այլ օրեր, որոնք մեր ազգային, պետական հիշատակի օրերն են եւ տոները: Եթե այդ տրամաբանությամբ գործենք, նշանակում է` մեր ամբողջ տոնացույցը պետք է փոխե՞նք, հարմարեցնենք ԵԱՏՄ-ում ընդունված տոնացույցի՞ն:
Հոդվածն ամբողջությամբ կարող եք կարդալ «Հայոց Աշխարհ» թերթի այսօրվա համարում